Shillong, Ïaïong 14
U Myntri Rangbah ka Jylla u Conrad K Sangma ha ka sngi Ba-ar u la pynïaid ïa ki jingïalang ha Tara Ghar state guest house, na ka bynta ban bishar bniah ïa ka jingïaid shaphrang halor ka jingpynkhreh ïa ka National Games, kumjuh kiwei pat ki jingthmu halor ki jingtei bad ki jingshakri ïa ka jylla.
“Ngi la pynlong ïa ki jingïalang bishar bniah ha kaba ïadei bad ka jingpynitynnad bad ka jingkhuid jingsuba baroh kawei bad kiwei kiwei ki projek ha sor ha Shillong, Jowai, bad Tura,” la ong u Sangma.
“Ka la dei shaphang kumno ban pynlong ïa ka kaba kham bha shuh shuh, kumno ngin pynrung ïa ki paidbah, kyrshan ïa ki paidbah, bad ïatreilang bad ki paidbah ban pynthikna ba ka jingkhuid jingsuba jong ka Shillong kan nangkiew shaphrang, ka rukom pynïaid ïa ki jaboh jabaiñ kaba kham biang, bad ruh ka jingpynïaid ïa ki um jaboh baroh kawei.”
Kane ka jingïalang ka la pynleit jingmut ruh halor ka jingpynkhreh ïa ka National Games, ha kaba u Sangma u la bishar bniah halor ki jingtei, ka jingpynbiang ïa ki jaka sah ki nongwan ïashim bynta, ka leit ka wan bad kiwei ki jingdonkam.
“Ngi la bishar bniah ïa baroh ki jingtip halor ki jingtei, ka jaka sah, ka leit ka wan, ka jingdon ki nongïalehkai ki ban wan ïashim bynta, ki jingïalehkai bapher bapher, ha kino ki jaka yn pynlong ïa ka, bad kiwei kiwei,” u la bynrap.
Kiwei pat ki jingïakren ba kongsan ki kynthup ïa ka jingtyrwa ban buh ïa ka Centre of Excellence na ka bynta ka Jylla, ha kaba u Sangma u la ong ba ka Jylla ka ïohi ïa ka lad kaba khraw ha katei ka bynta.
