Guwahati, ïaïong:
Ka Directorate of Enforcement (ED) ka la mudui ïa ka jingmudui hakhmat ka Special Court ha Assam hapoh ka Prevention of Money Laundering Act (PMLA) ha kaba ïadei bad ka jingkynnoh ba la ai pisa 60.30 klur tyngka bad ka pisa kaba ïadei bad ki projek pynroi khappud ha shilynter ka khappud Indo-Bangladesh.
Ka jingujor, kaba la ai da ka tnad Guwahati Zonal Office, ka jer kyrteng ïa ki katto katne ngut ki briew, kynthup ïa ki heh kiba dang shakri bad kiba la shongthait jong ka National Projects Construction Corporation Limited (NPCC), ryngkat bad ki director jong kawei ka kompeni shna ïing ki riewshimet bad ki kynhun ba ïadei bad ka.
Kiba la paw kyrteng ki kynthup ïa u Rakesh Mohan Kotwal, Zonal Manager barim (Northeast Region) jong ka NPCC; Latiful Pasha, Ophisar-in-Charge jong ka Jalpaiguri Project Office, u Anish Baid bad u Binod Singhi, ki director jong ka M/s Shree Gautam Construction Company Ltd., bad u Sunil Kumar, nalor kiwei pat kiba don ka jingïadei bad ki tnad treikam ba ïasoh, kynthup ïa ka M/s Jaichand Lal Singhi.
Katkum ka jingong jong ka kynhun ED, kane ka mukotduma ka dei kaba ïadei bad ki kontrak ba la ai da ka NPCC na ka bynta ki shipai ka tnat Border Security Force (BSF) na ka bynta ban tei ïa ki khyndai tylli ki Border Out Post (BOP) ha shi lynter ka khappud Indo-Bangladesh.
Ka tnad ka la kynnoh ba u Kotwal bad u Pasha ki la dawa pisa tuh 33 lak tyngka, hadien la ïakren haduh 30 lak tyngka, na u kontraktor u Anish Baid na ka bynta ban pynkhuid ïa ki bill kiba dang sahteng kiba kot sha ka 2.24 klur tyngka.
Ka jingtohkit kaba la sdang halor ka ejahar kaba la buh jingthoh da ka Central Bureau of Investigation (CBI), ka la lap ïa ka jingbuddien halor ka jingïaid jong ka pisa kaba donkti bad ka jingïaid jong ka pisa kaba T.25 lak lyngba ki lad ba la suba ba ki dei ki lynti ba beaiñ kiba treikam ha kylleng ka Silchar, Guwahati bad Delhi.
La kynnoh ba ïa ka pisa la pynïaid lyngba ki Account ba ïadei bad ka Shree Gautam Construction Company Ltd bad ka M/s Jaichand Lal Singhi hashwa ban phah sha M/s Vinit Distributors. Ka kynhun CBI, ka la khanglad ïa katei ka jingkhaïi, ha ka 14 tarik Nairung, 2019, ha kawei ka Hotel ha Delhi, ha kaba la kynnoh ba la aiti ïa ka pisa kaba T.25 lak sha u Sunil Kumar. Ïa kane ka pisa la dep ban kurup noh.
Ha kawei pat ka khubor kaba ïadei bad kane, ka kynhun ED ka la ïathuh ba la ïoh kurup sa T.15 lak tyngka na kawei ka jaka pyni kali Hyundai ha Silchar, ha kaba la kynnoh ba la buh ïa ka katkum ka jingbthah jong u Binod Singhi.
Ka tnad ka la kynnoh shuh shuh ba ki heh ba shah kynnoh ki la pan jingpynhun be-aiñ na ki kontraktor kiba bun kiba donkti ha ki projek NPCC ha ka thaiñ, kaba pyni ïa ka rukom bamsap kaba kham jylliew.
Baroh kiba shah kynnoh la pynngat hapoh ka kyndon 3 jong ka Prevention of Money Laundering Act, 2002, kaba kit ïa ka jingpynshitom katkum ka kyndon 4.
Ka kynhun ED ka la ong ba ka jingtohkit kaba bniah ka dang ïaid shakhmat ban lap ïa ka jingheh ba pura jong ka kynhun ba la shah kynnoh bad lada dang don kiwei pat ki nongïoh myntoi ha kaba ïadei bad kane.
