Shillong, Ïaïong 14
U Vaibhav Sooryavanshi, u rangïalehkai ba dangkhynnah u la nangjam ha ka kam ïalehkai kriket, ha kaba mynta u la nangjam shaphrang bad katkum ki khubor la ong ba une u rangïalehkai ba dang 15 snem ka rta u la shah jied ha ka sien nyngkong eh ban don bynta hapoh ka kynhun ïalehkai (senior) jong ka ri.
La ïathuh ba u Sooryavanshi, u la shah kynthup lang hapoh ka thup jong ki rangïalehkai, na ka bynta ka jingleit ïalehkai jong ka India sha Ireland, ha ryngkat ki katto katne kiwei pat ki rangïalehkai kiba don jingkyrmen. La khmih lynti ba ka India kan sei ar tylli ki kynhun ïalehkai, namar ka selection committee hapoh ka jingïalam u Ajit Agarkar ka dang pynkhreh ban tynjuh ïa ka jingkhlaiñ jong ka kynhun jong ki rangïalehkai kiba shah pynshong ben.
“U don ha ka jingïakhun na ka bynta ka jingleit sha Ireland, bad ki nongjied ki la jied ïa ka kyrteng jong u ryngkat bad kiba bun kiwei pat ki nongïalehkai,” ong ka tyllong khubor na ka Indian cricket board.
Katkum ka thymmei khubor, la ong ba u Vaibhav u dei ban shah jied na ka bynta ka series ka ban sa wan ha Ireland bad kumjuh ruh ha ka jingleit ïalehkai ïa ka Zimbabwe ha kaba kut jong u snem.
U Vaibhav, uba la dep ban pynpra bun tylli ki rekod ha ka jingïalehkai kriket ha la ki jong ki rta ïalehkai, ula sdang ïa ka samoi ïalehkai IPL 2026 da ka jingkmen na ka bynta ka Rajasthan Royals. U la lah ban ïalehkai bha ha ki 26 bol da kaba kamai 78 run ha ka jingïakhun pyrshah ïa ka Royal Challengers Bengaluru, 17 bol da 52 run pyrshah ïa ka Chennai Super Kings, bad 14 bol da 39 run pyrshah ïa ka Mumbai Indians, kaba la pynlong ïa ki nongïalehkai kriket barim bad ki riew shemphang ban ïasaid na ka bynta ban shah jied ïa u sha ka kynhun ïalehkai ka ri.
Wat u Chairman ka IPL u Arun Dhumal u la kynthoh ba u Vaibhav u dei hok ban ïoh ïa ka rekod ban long u rangïalehkai ba dangkhynnah tam jong ka ri India, da kaba tam ïa ki rekod ba la bat da u Sachin Tendulkar bad u Shafali Verma.
“Kaei ka jingpyni ba phylla jong u Vaibhav Sooryavanshi ha kane ka samoi ïalehkai IPL 2026. Une u rangïalehkai u dei hok ban ïoh ïalehkai nyngkong eh na ka bynta ka ri India bad ba un long uba rit tam eh hapoh ka kynhun. Ka long kaba khamñiar ban ïoh ïa u rangïalehkai uba don sap bad uba dangkhynnah ruh,”la ong u chairman u Arun Dhumal ha ka X.
Kumba ka long mynta, u Tendulkar u dang long u rangïalehkai ba dang khynnah tam na ki shynrang ban mihkhmat ïa ka India ha ka kyrdan ïalehkai ha ka pyrthei, ha kaba u la mihkhmat nyngkong eh ha ka rta kaba 16 snem bad 205 sngi. Ha ka jingkheiñ kyllum, ka Shafali Verma ka bat ïa ka rekod jong ka ri, ha kaba ka la mih madan nyngkong na ka bynta ka kynhun ki ‘thei ïalehkai jong ka India ha ka rta kaba 15 snem, hynñiew bnai, bad 27 sngi.
Te kumta ka India kan leit sha England hadien ka Ireland series, ban ïalehkai san tylli ki jingïalehkai ha ka T20Is bad lai tylli ha ka ODI ka ban sdang nduh 1 tarik u Naitung. Na ka bynta ka England, ka BCCI kan lah ban pdiang ïa ka jingwanphai ki rangïalehkai ‘senior’.
