Shillong, Ïaïong 14
Ka Nagaland ka la pynlong ïa ka jingïalang ba shisien shisnem ne ka Annual General Meeting (AGM) jong ka the Athletics Federation of India (AFI) ha ka sngi Ba-ar bad kane ka long ka sien kaba nyngkong eh ban pynlong ha kane ka jylla.
Ïa kane ka jingïalang sdang la pynlong ha Hotel Vivor ha Kohima bad la ai jingkren da u Myntri Rangbah u Dr. Neiphiu Rio, uba la pynpaw ïa kane ka prokram kum kaba kyrpang ïa kane ka jylla.
Ha kane ka jingïalang ka ban neh lai sngi lynter, la wan shim bynta da ki nongmihkhmat jong ki synjuk ïalehkai bapher bapher jong ka ri kiba la pynïasoh bad ka AFI.
Haba ai jingkren ha katei ka sngi, u Dr. Rio u la pynpaw ba ka Nagaland ka la sdang ban kiew stet wat hapdeng ki jingeh ha ki jingtei. U la kdew ba ka jylla ka la ïasoh bad ka Indian Olympic Association hadien bun snem bad mynta ka la pynleit jingmut ha ka ban kyntiew ïa ki sap jong ki samla. U la pynpaw ïa ka jingdonkam ban pynbha ïa ki jingtei, ka jinghikai ba tbit, bad ka jingplie lad na ka bynta ki nongïalehkai, ha ki kam ïalehkai. Te kumta u la kyntu ïa ka jingïatreilang na ka bynta ban pynkhlaiñ ïa ki jaka ïalehkai ha kane ka jylla. U la pynpaw ka jingshaniah ba ki jingïamir jingmut jong ka AGM kin ïarap bha ïa ka jingkiew kane ka jingïalehkai ha ka ri.
Ha kawei pat ka liang u Abu Metha, President ka Nagaland Athle-tics bad Vice President jong ka Athletics Federation of India, u la ong ba kane ka long kaba kongsan eh namar kane ka Jylla ka la ïoh ban pynlong ha ka sien kaba nyngkong ha ki 60 snem. U la ban jur ba kane ka jingïalang ka long kaba kongsan ha kaba kyntiew ïa ka jingïalehkai ha ka ri.
Kiwei pat kiba la ai jingkren ha kane ka sngi ki long u Dr. Lalit K. Bhanot, President ka South Asian Athletics Federation bad kiwei.
