Nongpoh, Ïaïong 14
Ka Pantah 12 Panthers ka la long ka lahduh ha ka Pahamsning T20 Cricket Tournament 2026 ba la pynïaid da ka Ri Bhoi District Cricket Association (RBDCA), hadien ba ka la pynliem noh ïa ka Nongkhyllem Tigers da 33 run ha ka jingïakhun final kaba la long ha ka sngi Ba-ar ha ka dong Pahamsning jong ka shnong Nongkhrah, Ri Bhoi District.
Ha kane ka sngi la ïadon lang u Myntri ka tnat ïalehkai ka Sorkar Jylla u Bah Wailadmiki Shylla ha ryngkat ka Kong Rona Khymdeit, MDC ka Nongpoh, u Bah Rayonald Kharkamni, Secretary ka Meghalaya Cricket Association (MCA) nalor kiwei de ki nongïalam ka MCA, RBDCA bad ki paidbah nongwan peitkai.
Haba phai sha ka jingïakhun, ka Pantah 12 Panthers ka la kam trai ban tied nyngkong ha kaba ka la kamai 158 run ha ki 20 over bad shah pynhap 7 wiket. U Wallam Kharbithai u la long u nongtied uba kynsai ha kaba u la ïoh ban khyrwit ïa ka shiteng spah kaba 61 run na ki 55 bol.
Haba wan shimti ïa ka pali kaba ar, ki nongtied ka Nongkhyllem Tigers ki ba pyrshang ban ïalehkai bha, hynrei na jingtriem jong ki nongkawang bol ka Pantah, ki la lah ban kamai tang 127 run ha ka 20 over bad shah pynhap 7 wiket. Te kumta ka Pantah 12 Panther ka la ïoh ban khur ïa ka nam lahduh.
Kum ka lahduh, ka Pantah 12 Tigers ka ïoh ïa ka khusnam pisa kaba T. 1 lak ryngkat bad ka trophy. Ïa ka nam Player of the Match bad Best Batter la ïoh da u Wallam Kharbithai na ka Pantah 12 Panthers, ïa ka nam Best Bowler la khur da u Laxman Gurung na ka Nongkhyllem Tigers.
Ha kane ka sngi, na ka liang ka RBDCA ka la pynkup burom kyrpang ruh ïa ki nongseng jong ka RBDCA naduh ki snem 1995, da kaba ai ïa ki memento kum ka dak ka jingburom ïa u synñiang u jong ki ban kyntiew ïa ka jingïalehkai kriket hapoh ka district.
