Shillong, Ïaïong 15
Ka jingpyntrei ïa ka projek siang phlang plastik ne Artificial Turf ha madan Umbuda, Ri Bhoi District ka la jan dep artad bad shen ki nongïalehkai katei ka thaiñ kin sa ïoh ban pyndonkam bad ban pyni ïa ki sap ba kyrpang ha ka jingïalehkai.
Ha ka jingleit jurip u MLA ka Nongpoh Constituency u Bah Mayralborn Syiem ha ka sngi Ba-ar ïa katei ka madan, u la shem ba shem ba katei ka madan ka la jam dep artad bad ki dangsah sa kumba katto katne ban hap ban pyndep.
Ha katei ka sngi la synran lang ïa utei u MLA da u District Sports Officer (DSO) ri Bhoi u Bah Bobby L Nongbet ha ryngkat, ki engineer jong ka State Sports Council of Meghalaya (SSCM), ki riew rangbah katei ka thaiñ bad kiwei kiwei.
“Ngi la wan jurip ïa ka madan artificial turf ha madan Umbuda ha kaba ngi la sakhi ba ka kam ka la ïaid kumba 95% bad ki dangsah sa kum katto katne ban pyndep khnang ban ïoh plie noh shen ïa ka.”
“Ngi la ïoh ban leit jngoh ïa ka jingpyntrei kaba dangshu sdang ka Synthetic Athletic Track ha ryngkat ka jingsiang ïa ka madan ïalehkai phubol da u phlang tynrai (natural ground) ha Chinchona, Pahamsyiem. Kane ka dei kaba dangshu dep mang pisa dangshen ha kaba ka kam ka la sdang bad la khmih lynti ban pyndep ha ka por kaba biang,” u la bynrap.
U Bah Syiem u la leit jngoh ruh ïa ka jingpyntrei na ka bynta ka madan Sohkhwai kaba la pynïaid da ka Sohkhwai Sports Association kaba kynthup ïa ki 3 tylli ki dorbar shnong kata ka Sohkhwai Nongbah, Umden La-ang bad ka Nongthyrlaw.
“Ïa kane ka projek la dep ban pyntrei bad ki dangsah sa kumba katto katne ban pyndep. Te kumta ngi la bthah ïa ka tnat ba dei khmih lem bad u contractor ba kin pyndep noh ha ka por kaba biang,” la bynrap biang u Bah Mayralborn.
