Imphal, ïaïong:
Ki jingjia jong ki jingïakynad bad ki jingkulmar ki la mih ha Bishnupur District jong ka Manipur hadien ba 18 ngut ki briew ki la mynsaw ha ka jingïakhih pyrshah ïa ka jingshah pynïap jong ki arngut ki khynnah rit ha ka jingshah ther bom ha katei kajuh ka distrik ha ka 7 tarik, Ïaïong.
Ki nongïakhih ha kawei ka surok bah ki la pynsangeh ïa kawei ka kali ha kaba ki suba ba ki briew kiba don tiar ïaleh kiba don bynta bad ki kynhun lehnoh Kuki ki ïaid lynti ha kane ka surok, la ïathuh ki khubor.
Ki la thang ïa kane ka kali, hadien kata la mih ka jingïakynad. Ïa kiba shong ha katei ka kali la rah noh da ki bor pahara.
Ki jingïakhih ki la jur bha ha kylleng ka distrik, ha kaba kiba bun ki la khang ïa ka surok hapdeng ka Bishnupur bad ka Churachandpur, bad ruh ïa ka surok bah kaba leit sha Imphal International Airport.
Ki nongleit nongwan ki la don ka por kaba ïakynduh jingeh shibun.
Kitei ki nongïakhih, ki la dawa ban kem ïa kito kiba la pynïap ïa kitei ki arngut ki khynnah- uwei u khynnah shynrang ba dang san snem bad kawei ka khunlung kynthei ba dang hynriew bnai, ha ka 7 tarik, Ïaïong, ha ka jingshah pynbthei bom ka ïingsah jong ki ha ka shnong kaba don ha Bishnupur katba ki dang ïohthiah.
Ka jingthombor jong ki lehnoh ka la pynmih ïa ka jingbitar bad jingsngewsih, bad ka la pynlong ïa ka jingïaleh pyrshah hapdeng ki nongïakhih bad ki CRPF hakhmat kawei ka ktem. Lai ngut ki briew ki la ïap ha ka jingsiat jong ki bor pahara; bun ki la mynsaw.
Ka sorkar Manipur, ka la khanglad ïa ka mobile internet ha ki san tylli ki distrik kiba kynthup ïa ka Bishnupur, Imphal West, Imphal East, Thoubal, bad Kakching- ha ka jingpyrshang ban khanglad ïa ka jingsaphriang jong ki khubor hamsaïa bad ban khanglad ïa ka jinghiar thma jong ki paidbah.
Ki bor pynïaid ki dang bteng ban buddien bha ïa ka jinglong jingman namar ba ka jingpynkhreh ïa ki bor pahara ka dang jur ha kylleng ki jaka kiba donkam.
