Shillong, Ïaïong 15
Ka Atletico Madrid ka la pynkut noh ïa ka jingïaid lynti ka Barcelona ha ka Champions League watla ka la shah rem da 2-1 kol ha ka wat kaba ar jong ka quarter-final hadien ba ka la tam da 3-2 ha ka aggregate ha ka sngi Balang.
Ha kane ka jingïakhun ka Barcelona ka la ïoh ban pynkhihjar nyngkong eh ha ka minit kaba 3 lyngba u Lamine Yamal bad kawei pat da u Ferran Torres ha ka minit ba 24. Hynrei hadien shiteng kynta u Ademola Look-man u la lah ban pynphai kylla shi kol na ka bynta ka Atletico, ha kaba kane ka la biang pura namar ka la jop teng da 2-0 kol ha ka wat kaba nyngkong.
Hapoh ka jingïalam u Diego Simeone, ka Atletico ka la lah ban jam sha ka semi-final jong kane ka lympung ha ka sien kaba nyngkong eh naduh ba ka rung teng ha u snem 2017.
Ka jingkyrmen ka Barcelona ban jam sha ka extra time kam shym la urlong hadien ba u rangïalehkai ‘dien jong ka, u Eric Garcia u la shah beh noh na madan na ka daw ba u la pynur ïa u Alexander Sorloth katba u dangmareh ban rah ïa ka kol.
Ka Atletico kaba khlem pat ju jop ha kane ka lympung bad kaba la shah rem ha ka phainal ha u snem 2014 bad 2016 hapoh ka jingïalam jong u Simeone, mynta kan ïakhun pyrshah ïa ka Arsenal lane ka Sporting Lisbon ha ka semi final.
“Ngi sngewkmen, hadien ba ngi la lah ban pynliem ïa ka kynhun ba khlaiñ bor kum ka Barca. Ka long kaba eh ïa ngi ha kaba sdang, hynrei kum ka kynhun kam shym la duh mynsiem na ka bynta ban kynjoh sha ka thong,” la pynpaw u rangïalehkai shapdeng ka Atletico u Koke.
Ka Barcelona ka la jop khatduh ïa ka Champions League ha u snem 2015, bad ka jingap jong ki ïa kawei pat ka nam lahduh ka dangïai bteng. U rangïalehkai shapdeng u Frenkie de Jong u la ong ba ka kynhun ka dangkiew shaphrang watla ka la kut noh ka jingïaid lynti ha kane ka jingïakhun.
Haba phai sha kawei pat ka jingïakhun, ka Liverpool ka la duh rung sha ka semi final hadien ba ka la shah rem biang ha ka Paris Saint-Germain da 2-0 kol ha ka wat kaba ar jong ka quarter final.
Kane ka la wan urlong lyngba u Ousmane Dem-bele (72 & 90+1) na ka bynta ban tam da 4-0 ha ka aggregate hadien ba ka la jop da 2-0 kol ha ka wat kaba nyngkong.
