Shillong, Ïaïong 15
Uwei u rangïalehkai phutbol jong ka Ghanaian Premier League, u Dominic Frimpong, u la khlad noh hadien ba ki nonglute ba la kieng atiar bha ki la thom bor ïa ka kynhun jong u ha ka por ba ki dangwanphai na ka jingïalehkai ha ka sngi U Blei, la pynpaw ka Ghana Football Association.
Katei ka jingjia ka la pynkyndit ïa ka ri hi baroh kawei bad ka la wanrah ka jingduh kaba khraw bad kumjuh ïa ki para nongïalehkai.
Na ka liang ka klob ka Berekum Chelsea FC ka la pynpaw ha ka kyrwoh ba ki briew kiba la kah durkhmat ha ryngkat ki suloi ki la siat ïa ka bus jong ka kynhun ïalehkai bad ka la pynlong ïa ki nongïalehkai ba kin phet rieh ha ki lawbniap.
Kane ka jingjia ka la jia ha ka por kumba 10:30 mynmiet ha ka surok bah jong ka Ahyiresu-Kwame Dwumor Sreso kaba ha Nyinahin District jong ka bynta ka Ashanti Region ha Ghana.
Ha katei ka jingjia,u Dominic Frimpong u la shah siat. Na ka liang ki bor pulit ki la pynkit sha jaka sumar, hynrei hadien u la khlad noh hashwa ba un ïoh jingsumar.
Ka jingshah lute kaba shyrkhei ka la ktah ruh ïa kiwei pat, kynthup ïa uwei u briew uba la 52 snem ka rta. “Uwei pat uba shah lute, u George Owusu Afriyie, 52 snem ka rta, u la shah lute ruh bad ka pisa kaba 4,500.00 cedis ($408),” la ong ka kyrwoh jong ki pulit.
Ki bor pynïaid ki la pynthikna ïa katei ka jingjia bad ki la batai ba ka dei ka jingshah thombor kaba la wanrah ïa ka jingduh ïa ka jingim bad ka jingshah tuh.
Ka Ghana Football Association ka la ong ba katei ka jingjia ka la long kaba “sngewsih” bad “ka jingduh kaba khraw ïa ka Berekum Chelsea hynrei wat ïa ka phutbol ha Ghana hi baroh kawei.”
