Shillong, Ïaïong 15
Ka International Cricket Council (ICC) ha ka lah sngi U Blei, ka la pynbna ïa ka khusnam kaba heh duh kaba la kot sha ki T.82 klur na ka bynta ka Women’s T20 World Cup ka ban sa long shen ha England bad Wales hadien ki ar bnai ban wan.
Ïa ka khusnam la kyntiew da 10 percent na kaba long mynshuwa. Kane ka lympung kan don 12 tylli ki kynhun kaba 10 tylli ha u snem 2024, ha kaba yn sdang naduh 12 tarik u Jylliew haduh 5 tarik u Naitung ha ki hynñiew tylli ki jaka, bad ïa ka jingïalehkai phainal yn pynlong ha Lord’s Cricket.
Katba ka khusnam pisa kaba la long ha ki snem ba la lah ha UAE ka long USD 7,958,077 (kumba T.74 klur), mynta ka la kiew sha ka USD 8,764,615 (kumba T.82 klur), kaba pyni ïa ka jingkiew kaba 10 percent ban ïa kaba long ha u snem 2024.
Ki nongjop kin rah sha ïing ïa ka khusnam kaba T. 2,340,000 (21.8 klur tyngka), katba kiba wan ba-ar kin ïoh 1,170,000 (10 klur tyngka). Ki kynhun kiba shah rem ha ka semi final kin ïoh USD 675,000 (Rs 6.29 klur), katba ki jingjop ha man la ki jongïalehkai group kin ïoh USD 31,154 (T. 29 lak).
“Baroh 12 tylli ki kynhun kiba ïashim bynta kin ïoh ïa ka khusnam kaba rit tam kaba USD 247,500 (T. 2.06 klur kumba),” la ong ka ICC ha ka jingpynbna.
Kane ka lympung ïalehkai kan sdang ha kaba ka England kan ïakhun pyrshah ïa ka Sri Lanka ha Edgbaston, Birmingham ha ka 12 tarik u Jylliew.
Kiwei pat ki kynhun kiba don ha kane ka lympung ki long ka Australia, Bangladesh, India, Ireland, Nether-lands, New Zealand, Pakistan, Scotland, South Africa bad West Indies, ha kaba kane ka jingïalehkai kaba don 33 tylli ki jingïalehkai la buh ban ïakhun hapoh ki 24 sngi.
Ha kajuh ka por, ka trophy jong ka T20 World Cup kan leit sha ki nongbah jong katei ka ri kaba pynlong ïa kane ka lympung shwa ban pynkut ha London, ha kaba ka Scotland kan long ka jaka sangeh kaba nyngkong naduh ka 7 haduh ka 10 tarik u Jymmang.
“Ka jingkiew jong ka kriket ki kynthei ka dang ïai bteng ban kiew shaphrang, bad ka jingpynïar ïa ka ICC Women’s T20 World Cup sha ki 12 tylli ki kynhun, ka pynpaw ïa ka jingangnud jong ngi ban tei ïa ka jingïalehkai ha ka pyrthei kaba kham khlaiñ,” la ong u CEO jong ka ICC, u Sanjog Gupta.
