Shillong, Ïaïong 15
Ka lympung ïalehkai 5th Meghalaya State League ka la sdang da ka jingïakhun jong ka Group-A, ha kaba ka Nongkseh SSCC ka la khur ïa ka jingjop kaba nyngkong hadien ba ka la pynliem ïa ka Khimusniang SC da 2-1 kol ha ka sngi Balang ha SSA Stadium, First Ground, Polo.
Kane ka la wan lyngba u Sheen Sohktung (19′) bad u Hardy Cliff Nongbri (90’+2), katba ak Khimu-sniang ka la pynphai kylla shi kol lyngba u Dawanbiangmi Passah (51′).
Kumban shu pynkynmaw kine ki ar kynhun ki la ïoh ban ïuh kjat nyngkong ha kane ka lympung ba la pynïaid ïa ka da ka Meghalaya Football Association ha ryngkat ka jingkyrshan lang da ka tnat ïalehkai ka Sorkar Jylla.
Ïa kane ka lympung la plie da u Myntri ba dei khmih ïa ka tnat ïalehkai u Bah Wailadmiki Shylla ha ryngkat ki nongïalam ka MFA u Bah Hamletson Dohling, Bah Sunesh Syiem kiba long President bad Secretary ka MFA bad ki dkhot nongkit kam jong ka, bad ba la wan ban sakhi bad ai mynsiem ïa ki kynhun da ki paidbah nongkyrshan jong baroh ar ki kynhun.
Haba phai sha ka jingïakhun, marsien ïa sdang, ka Khimusniang, ki la lah ban tynjuh borbah bha ïa ka Nongkseh, katno tam lei lei na u Dawanbiangmi uba la lah shisha ban pynpaw ïa la ka jingtbit bad pynkhih win bha ïa ka kut ïalehkai ka Nongkseh.
Pynban ynda haba ka jingïakhun ka la jam palat ïa ka shiphew minit, ba ka Nongkseh ka la ïalehkai bha bad ha kum kane ka por u Sheen u la ïoh ban khyrwit jam bad u la ïoh ban pynkhih jar.
Hadien kane ka shi kol, ka Nongkseh ka la ïai bteng ban kham ñion shakhmat ïa la ka rukom ïalehkai jong ka, ha kaba sa kiwei pat ki rangïalehkai kum u Shano Tariang, Chesterpaul Lyngdoh ba ka jingpyrshang jong ki ban pynkhih jar ki la shu lait salit.
Haba wan ban bteng ïa ka kylla miet, ka Khimusniang ka la ïoh ïa ka kabu ksiar ban pynphai shi kol, hadien ba ka la don ka jingbakla na ki rangïalehkai ka liang pyrshah, kaba hangne u Dawanbiangmi marsien ïoh ïa ka bol u la rah shakhmat bad ha ka khyllipmat kaba biang u la ïoh ban thep hi jlang.
Kane ka kol, ka la pynkhih win ïa ka stadium ka SSA, ha kaba ki paid nongwan peitkai ruh kim lah shuh ban batai la hato kane ka jingïalehkai ka poi sha ka jingïakhaid.
Ha ki kynta ba ka jingïakhun kan khreh ban jam sha kaba kut, u Bah Richard Nongneng, coach ka Nongkseh, u la wanrah ïa ka jingkylla ha ka kynhun ban bujli ïa lai ngut ki rangïalehkai, ha kaba u Hardycliff Nongbri ha ki minit ba ka jingïakhun kan poi sha kaba kut, u la ïoh ban thep ïa ka kol kaba ar bad ban khur syndon ïa ka jingjop.
