Shillong, Ïaïong 16
Ka Arsenal ka la jam sha ka semi final ha ka Champions League hadien kane ka kynhun ïalehkai jong ka Premier League ka la ïakhaid khlem don ba lah ban thep kol pyrshah ïa ka Sporting ha ka sngi Palei ha Emirates Stadium.
Kane ka jingïoh rung ka Arsenal ka dei hadien ba ka la jop da 1-0 kol ha ka wat kaba nyngkong bad kane ka shi kol ka la wan lyngba u Kai Havertz ha ka taïew ba la lah ha Portugal bad kane ka la biang pura ïa kane ka kynhun ban jam sha ka semi final jong kane ka lympung.
Ka Arsenal ka la sdang ïa ka jingïalehkai da ka jingkhmih lynti ban ïoh thep kol, hynrei dei ka Sporting kaba la ïoh ïa ki kabu kiba biang ban ïoh thep kol ha ka kylla step.
Ha ka kylla miet kine ki kynhun ki la pyrshang ban ïakhun ha kaba ki la ïoh ki katto katne ki kabu ksiar, hynrei ha kaba kut kim shym la lah ban pynurlong bad mad ïa ka jingïakhaid.
Te kumta ka Arsenal ha ka rung ha ka sien kaba nyngkong eh sha ka semi final bad kan pynkhreh ban ïakhun pyrshah ïa ka Atletico Madrid na ka bynta ban ïaknieh rung sha ka final.
