Shillong, Ïaïong 16
U coach ka Real Madrid, u Alvaro Arbeloa, u ong ba ka rai ban beh noh ïa u Eduardo Camavinga, ka la pynsniew dur noh ïa ka jingïalehkai quarter final jong ka Champions League ha ka sngi Palei, hadien ba ka kynhun jong u, ka la shah rem noh ha ka Bayern Munich.
Ha kane ka jingïakhun u Camavinga u la ïoh jingsneng da ar tylli ki yellow card bad u la shah beh na madan saw minit shwa ban kut ki 90 minit ha ka quarter final jong ka wat kaba ar ha kaba ka Real Madrid ka la shah rem noh da 3-4 kol ha ka Bayern Munich bad ban tam da 6-4 ha ka aggregate. Te kumta ka Bayern kan ïakynduh pyrshah ïa ka Paris Saint-Germain ha ka semi final.
Utei u rangïalehkai na France u la ïohpdiang ïa ka yellow card kaba ar namar ba u la pynslem ïa ka jingsdang biang hadien ba u la shah pynur ha u Harry Kane.
“Ka long ka bynta lah ban pdiang ban beh ïa u rangïalehkai ha kum kane ka jingïalehkai,” la bynrap u Arbeloa.
“Ngi sngew ba kane ka long kum ka jingpynduh mynsiem bad kaba pyndom ha kum kane ka por. Kane ka long kum ka jingïalehkai kaba pynpaw pyrthei ïa ka samoi jong ngi.”
U Arbeloa u la ong ba u rephri u la pynsniew dur noh ïa ka jingïalehkai da kaba beh noh ïa u Camavinga, bad ha ka jingshisha um pat dei pura ban shah sei ïa ka yellow card.
“Nga sngew ban ong ba u rephri um tip wat ba u la dep ai card nyngkong, bad dei na kata ka daw ba u la leh kumta, hynrei u la pynsniew dur noh ïa ka jingïalehkai. Ha ka jingshisha nga sngew ba ka long ka jingïalehkai kaba itynnad, hynrei kumno ka shu kut noh.”
Da kane ka jingshah rem ka Real Madrid ka long ka sien kaba ar ba kam shym la lah ban khur jingjop, ha kaba kane ka kynhun jong u Arbeloa ka la duna 9 poiñ ïa ka Barcelona, kaba dangbat ïa ka kyrdan ba hakhlieh ha ka La Liga.
