Shillong, Ïaïong 16
U President ka FIFA, u Gianni Infantino, ula pynthikna ba ka Iran kan ïashim bynta ha ka FIFA World Cup 2026, wat hapdeng ka jingïakynad, kaba dangïai bteng ha Middle East, da kaba ban jur, ba ka jingïalehkai phutbol ka dei ban long kaba kyrpang na ka saiñ hima sima.
Haba kren ha ka jingïalang jong ka ‘economic conference’ ba la pynlong da ka CNBC ha ka sngi Balang, u Infantino u la ong, “Ka Iran ka la thikna ban ïashim bynta. Ngi kyrmen ba ha kata ka por ka jinglong jingman kan wanphai biang sha ka jingshong suk, kata kan ïarap shisha,”
“Hynrei ka Iran ka hap ban wan namar ka mihkhmat na ka bynta ki briew jong ki, ka la ïoh rung sha ka World Cup bad ki nongïalehkai ki kwah ban ïalehkai,” u la bynrap namar katei ka kynhun kan hap ban pynkhreh ïa ki jingïalehkai ki ban long ha United States ha u Jylliew mynta u snem.
Ka jingïashim bynta jong ka Iran ka la don hapdeng ka jingartatien hadien ka jingïakynad kaba la takhuh bad ka ri America bad ka Israel ha kaba sdang jong une u snem. Te kumta kane ka kynhun ka la thmu ban ‘boycott’ na kane ka jingleit shim bynta bad ka la kyrpad ban pynkynriah noh ïa ki jingïalehkai na America, hynrei ka FIFA ka la kyntait noh ïa kane ka jingtyrwa. Katei ka kynhun kaba na dewbah Asia ka dei ban ïakhun ïa ki jingïalehkai ha ka Group-G ha America, ar tylli ha Los Angeles bad kawei ha Seattle, katba ka don ha Tucson, Arizona.
Katei ka jingïakynad ka la nang jur hadien ka 28 tarik u Rymphang, hadien da ki taïew ka jinghiar thma da ki liengsuiñ.
Watla ka jingïateh kular kam shym la long kaba seisoh ha ka 8 tarik mynta u bnai, hynrei ki jingeh ha ka saiñ hima sima ki dangsah, kynthup ïa ki jingkhang ha ka Strait of Hormuz bad ki lad jingïada duriaw ba la pynjari da ka US kiba ïadei bad ki kad liengsuiñ jong ka Iran.
U Infantino, u la kren ïa kitei ki kyntien, ha u Lber, ha ka por ba u leit ban sakhi ïa ka jingïalehkai paralok hapdeng ka Iran bad ka Costa Rica, ha Antalya, Turkey, watla u President jong ka America, u Donald Trump, kham hashwa, ula ai jingmut ba ki nongïalehkai jong ka Iran, ki lah ban nym ym long kiba “shngaiñ” ha America.
Ïa kane ka World Cup 2026, yn pynlong lang da ka United States, Canada bad ka Mexico, kaba long ruh ka sien kaba nyngkong ka ban don haduh 48 tylli ki kynhun bad kan sdang naduh 11 tarik u Jylliew.
