Shillong, Ïaïong 17
Ka wat kaba ar jong ka lympung ïalehkai Indian Women’s League 2025-26 kan sdang naduh 27 tarik mynta u bnai ha Kolkata.
Ka jingïakhun kaba nyngkong kan sdang da ka jingïalehkai hapdeng ka East Bengal FC bad ka Sribhumi FC ha madan ïalehkai jong ka East Bengal Ground. Ïa ka wat kaba nyngkong la pynlong naduh 20 tarik u Nohprah jong u snem 2025 haduh ka 9 tarik u Kyllalyngkot jong u snem 2026, ha kaba la lah ban pyndep ïa 27 tylli ki jingïalehkai.
Ïa kane ka lympung la pynsangeh kumba lai bnai na ka daw ban ailad ïa ki ‘thei ïalehkai ba ki ïoh ban ïadon bynta bad ka kynhun ïalehkai ka ri ha ka AFC Women’s Asian Cup kaba la long ha u Lber lem bad ka AFC U20 Women’s Asian Cup mynta u bnai Iaiong.
Ia ki 29 tylli ki jingïalehkai yn pynïalehkai ha ka wat kaba ar naduh 27 tarik mynta u bnai haduh 18 tarik u Jymmang, ha kaba ki phra tylli ki kynhun kin ïakhun pyrshah ha ka wat kaba ar kaba don ar tylli ki wat jingïakhun (double round-robin) jong kane ka lympung. Ïa kine ki jingïalehkai yn pynlong ha ki ar tylli ki madan ïalehkai kata ha ka National Centre of Excellence jong ka AIFF bad ha madan jong ka East Bengal Ground.
Ka East Bengal kaba long ka lahduh ha ka aiom ba la lah, ka dangbat ïa ka kyrdan ba hakhlieh ha kaba ka la kamai 18 point na ki hynriew sien ïakhun, katba Sesa FA bad ka Kickstart FC ki la don ha u lain jong ka jingshah pynhiar kyrdan sha ka IWL-2 namar ki dangkamai 1 point bad 6 point.
Ka kynhun ban bat ïa ka kyrdan ba hakhlieh kan long ka lahduh. Ha kawei pat ka liang ki ar tylli ki kynhun ki ban wan ha ki kyrdan ba hakhlieh ha ka wat kaba khatduh jong ka IWL-2 2025-26 kin kiew kyrdan sha ka IWL 2026-27.
