Shillong, Ïaïong 17
Ka SCA Academy, St. Nanak SS bad ka Nong-thymmai Nepali School ki la khur jingjop ha ka Inter School Under-15 Cricket Tourna-ment ba la pynïaid da ka Shillong Cricket Association ha ka sngi Thohdieng.
Ha kane ka jingïakhun kaba la long ha madan Urkaliar, Shillong, ka SCA Academy ka la pynliem noh ïa ka Holy Cross SS da 7 wiket. Ka SCA Academy kaba la jop ïa ka kynting pisa ka la ailad ïa ka Holly Cross ban tied nyngkong ha kaba ka la kamai 90 run bad shah pynhap 8 wiket ha ki 20 over. U Veerat Singh u la tied 33 run na ki 30 bol. Katba u Devansh u la khur 2 wiket.
Haba wan shimti ïa ka pali kaba ar, ka SCA Academy ka la lah ban kynjoh sha ka thong da kaba kamai 92 run bad shah pynhap 3 wiket ha ki 13.4 over. U Saksham u la tied 26 run na ki 24 bol bad u Devansh u la ïoh 23 run na ki 23 bol. Katba u Niraj Rai u la khur 1 wiket. Ïa ka nam Player of the Match la khur da u Devansh.
Kumjuh ha ka jingïa-khun kaba ar, ka St. Nanak ka la jop da 64 run ïa ka Little Angle School lyngba ka DLS method hadien ba la pynduna sha ki 5 over. Ka St. Nanak kaba la shimti ban tied nyngkong ka la kamai 78 run bad shah pynhap 2 wiket ha ki 5 over. U Uyush Kumar u la tied 32 run na ki 14 bol bad u Ganesh Kumar u la ïoh 12 run na ki 9 bol. Katba u Rehan Qureshi u la khur 1 wiket.
Haba wan beh ïa ka thong, ka Little Angel ka la kamai tang 14 run bad shah pynhap 5 wiket ha ki 5 over. U Rehan Qureshi u la tied 3 run na ki 8 bol bad u Rizwan u la ïoh 6 run na ki 7 bol. Katba u Ayush Kumar u la khur 1 wiket. Ïa ka nam Player of the Match la khur da u Ayush Kumar.
Haba phai sha kawei pat ka jingïakhun kaba khatduh, ka Nongthymmai Nepali School ka la jop da 7 wiket lyngba ka DLS method ïa ka Mada-rasa Hemyatul Islam LP School. Ka Madarasa kaba la shimti ban tied nyngkong ka la kamai 123 run bad shah pynhap 5 wiket ha ki 16.2 over. U Rehian Ali u la tied 39 run na ki 24 bol. Katba u Runu Sinha u la khur 2 wiket.
Ka Nongthymmai Nepali School ka la lah ban kynjop sha ka thong hadien ba ka la wan shimti ïa ka pali kaba ar da kaba kamai 130 run bad shah pynhap 3 wiket ha ki 12 over. Kane ka la wan urlong lyngba ka jingïalehkai bha da u Raj Paswan uba la khyrwit ïa ka shiteng spah kaba 78 run na ki 46 bol. Katba u Farhan Alam u la khur 1 wiket. Ïa ka nam Player of the Match la khur da u Raj Paswan.
