Itanagar, ïaïong:
U Myntri Rangbah ka Arunachal Pradesh, u Pema Khandu u la ong ba ka Siang Upper Multipurpose Project (SUMP) ka dei ka jingthmu ba kongsan jong ka ri kaba don ka jingkordor kaba ïadei bad ki jingdonkam ha ka liang ka jingïada, ka jingpynïaid beit ïa ka mariang bad ka jingkiew ha ka ïoh ka kot.
Ha ka jingleit jngoh jong u ïa ka shnong Riga ha Siang distrik, u Myntri Rangbah u la ïathuh ha ka jingïalang paidbah ba kumba 70 percent ki nongshong shnong ki la dep ban mynjur da kaba soi ïa ki MoU na ka bynta ka jingpule shwa ïa ka jingtreikam jong ka projek.
U la khot ruh ïa ki nongshong shnong kiba dang sah ban ai ka jingkyrshan, da kaba ong ba kane ka projek ka ai jingmyntoi kaba kham heh na ka bynta ka thaiñ.
Katkum ka jingong jong u, kane ka projek kan don bynta ban tehlakam ïa ka jingshlei um, ban pynneh ïa ka jingtuid jong ki wah, ban pynbha ïa ka jingpynïaid ïa ka um bad ban ïada ïa ki jaitbynriew kiba sah ha ki bynta ba shapoh wah.
U la pynpaw shuh shuh ba kan ïarap ban ïada ïa ka mariang jong ka wah Siang katba kan pynbha ruh ïa ka jingpynkhreh jong ka India ha kaba ïadei bad ki jingkylla kiba jia ha ki thaiñ ba shalor jong ka wah.
Haba jubab ïa ki jingeh, u Khandu u la kren shai ba ka kyrdan pule kaba mynta kam mut ka jingmynjur ban tei.
U la bynrap ruh ba ka jingïamir jingmut bad ki paidbah kan long ha ki bynta kiba hadien bad ba ïa ki rai ba khatduh yn sa shim tang hadien ba la ïakren bad ki kynhun jaitbynriew kiba shah ktah.
Kane ka projek kaba la antad kan long kumba 1.5 lak klur tyngka, la khmih lynti ba kan wanrah ïa ki jingmyntoi kiba khraw ha ka jingpynroi ïa ki jingtei, ka jingthaw kam thaw jam, ka jingroi kaba ïadei bad ka rep ka riang bad ka jingkyrshan bai lutksan ïa ki trai jaka, u la ong.
Ha kane kajuh ka prokram la sdang ruh ïa ki kam pynroi kiba shongdor T.196.44 klur bad la buh ruh ïa ki maw nongrim, ong ka khubor.
Kine ki jingtrei ki kynthup ïa ka ïing jong ki nongtrei, ka ïing dorbar paidbah ha New Hiram ha Riga, ka thanat pulit jong ki kynthei ha Pangin bad ka ïing lehkai ba bun rukom ha Pegging Bote.
U la sdang ruh ban tei ïa ka Hostel kaba don 120 jingthiah bad kiwei kiwei ki jingpynbha ïa ki jingtei ha ka skul bah sorkar ha Pangin, ryngkat bad ki kam pynbha ïa ki surok ha ka jaka treikam jong ka Boleng.
Kyrpang, la plie paidbah ïa ki katto katne ki projek kiba la dep pyndep, kynthup ïa ka Industrial Training Institute (ITI) ha Pangin, ka surok ar lynti kaba pynïasoh ïa ka BRTF Rengo bad ka distrik hospital ha Boleng, ka jingkieng Bailey kaba 70 metre halor ka wah Subbung ha ka lynti ïaid ka Dosing-Pareng-Yibuk, bad ka Fire Station ha Boleng.
Ha Riga, Boleng bad ha kylleng ka distrik, u Myntri Rangbah u la pynpaw ïa ki jingthmu na ka bynta katto katne ki projek thymmai, kiba kynthup ïa ka Circuit house, ka rukom pynpoi um kaba la pynbha bad kyntiew bad ka madan ïalehkai ban pynwandur na ka bynta ban pyndonkam paidbah.
