Shillong, Ïaïong 17
Ki lai tylli ki kynhun ki la ïoh ban thep kol kham bun ha ka sngi kaba lai jong ka lympung ïalehkai 5th Meghalaya State League ha ka sngi Thohdieng, katba kiwei pat ki kynhun ki la shu jop da ka said.
Ka Mawlarshong SC ka la pynliem noh ïa ka Seng Samla Umdang Pyllun da 5-1 kol ha ka Group-H ha Mawkyrwat, katba ha Williamnagar, ka Janepih Youth SCA ka la pynliem ïa ka Attong Matgrik FC da 3-0 kol ha ka Group-G bad ka Langsning FC ka la jop da 4-1 kol ïa ka Mishon SSCC ha Mairang ha ka Group-F.
Ha kane ka jingïakhun ka Umdang Pyllun ka la lah ban ïalehkai bha ha kaba la ïoh ban pynkhih jar nyngkong lyngba u Rangkynsaistar Mawsor. Hynrei ka Mawlarshong ka la wanphai da ka jingkhlaiñ bor ha kaba ka la pynphai kylla ar kol ha ka kylla step lyngba u Hopefullness Wanñiang (36′) bad u Arkwis Wanñiang (43′). Kane ka kynhun ka la thep biang sa lai kol ha ka kylla miet ha kaba u Wiwonstar Nongsiej (74′ & 85′) u la thep ar kol bad ïa kawei pat la thep da u Lenny Kravitz Lyngdoh (83′) bad ban khur syndon ïa ka jingjop.
Kumjuh ha kawei ka jingïakhun u Rikyrshan Warjri (3′) u la long u nongthep kol uba stet tam ha kane ka lympung na ka bynta ka Mishon hashwa ba u Nelson Rymbai (5′ & 8′) u la pynphai kylla ar kol na ka bynta ka Langsning. Kane ka kynhun ïalehkai jong ka Shillong Premier League ka la thep biang lyngba u Kyrmenskhem Mukhim (45′) na ka bynta ban tam da 3-1 kol ha ka kylla step hashwa ba u Manbhalang Nongmin (77′) un thep ha ka kylla miet bad ban khur syndon ïa ka jingjop.
Ha kawei ka liang ka Attong Matgrik ka bym shym la lah ban khur jingjop ha ki jingïalehkai jong ka MSL 2024, hynrei mynta ka kynti ka la bteng biang ïa ka jingshah rem ha ka Janepih da 3-0 kol ha Williamnagar. Ïa kine la thep da u Rishembhalang Wanñiang (38′), Banteilang Synnia (49′) bad ka Edyson Iawphniaw (65′).
Ha kane ka sngi ki la don ar tylli ki jingïakhun kiba la kut ha ki jingïakhaid na ka bynta ban ïasam mar shi poiñ. Ka Laskein SCSC bad ka Lamin XI SCC ki la kut ha ka jingïakhaid mar 2-2 kol ha ka Group-C kaba la long ha Amlarem. Ïa ka Laskein la thep da u Rithrangmiki Biam (14′) bad u Iomaikyjohn Lamare (77′), katba ïa ka Lamin XI la thep da u Jowel Khongdup (24′) bad u Genial Lamin (44′).
Kumjuh ha Wahïajer ha ka Group-E hapdeng ka Ïatyllilang Lumsehkot CSC bad ka Lamyrsiang SCC ki la kut ha ka jingïakhaid mar 1-1 kol. U Soniroy Suchiang (58′) u la pynkhih jar nyngkong ïa ka Ïatyllilang Lumsehkot, katba u Eborki Marsharing (81′) u la lah ban pynïakhaid na ka bynta ka Lamyrsiang.
Ha ka jingïalehkai jong ka Group-B kaba la long ha madan MFA Shillong, ka Mawlum Tyrsad SCC ka la shah rem noh ha ka Mawphu SC lyngba ka penalty ba la thep da u Ïakmenlang Khongjee (90’+4).
Ka Rymbai Shkenshynriah SC ka la jop da 1-0 kol ïa ka Jalaphet Moochut Pyrdung SC ha ka Group-D kaba la long ha Khliehriat. Kane ka la wan urlong lynba u Monush Lapang uba la thep ha ka minit kaba 74.
