Shillong, Ïaïong 19
Ka Real Sociedad ka la pynliem noh ïa ka Atletico Madrid lyngba ka tie-breaker da 4-3 kol na ka bynta ban rah ïa ka nam lahduh ha ka Copa del Rey ha ka sngi U Blei, hadien ba kine ki kynhun ka la ïakhaid da 2-2 kol wat hadien ba la pynjlan ïa ka por ïalehkai.
Kane ka nam jop ka wan urlong lyngba ka jingïalehkai bha u rangapkol jong ka, u Unai Marrero uba la lah ban khanglad ïa ki ar tylli ki bol ba la shut ha ka tie-breaker bad ban pynlong ïa katei ka kynhun ba kan rah ïa ka trophy ha ka sien kaba saw.
Ka Sociedad ka la ïoh ban rah khatduh ïa ka Cup ha u snem 2021, ha kaba ïa ka final 2020 la hap ban pynslem La Cartuja Stadium ha Seville, hynrei ym shym la shah ïa ki paidbah nongkyrshan na ka daw ka jingsaphriang ka khlam COVID.
Ha kane ka kynti, ki nongkyrshan jong ka Sociedad ki la ïoh ban lehkmen hadien ba ki la sakhi da la ki jong ki khmat ïa ka jingïalehkai bha u Marrero uba la lah ban pyllait na ka jingshah thep ki ar tylli ki bol ba la shut da ki rangïalehkai ka Atletico, u Alexander Sorloth bad u Julian Alvarez.
Katba u rangapkol ka Atletico u Juan Musso u la lah ban khanglad ïa ka bol ba la shut da u Orri Oskarsson ha ka tie-breaker, hynrei u Pablo Marin u la lah ban pynurlong ïa ka jingjop hadien ba u la lah ban thep kol.
Ka sien ba khatduh ba kine ki ar tylli ki kynhun ki la ïakynduh ka dei ha ka phainal jong u snem 1987, ha kaba ki la ïakhaid mar 2-2 ha kaba ka Sociedad ka la lah ban pynliem lyngba ka tie-breaker, bad kane ka la wanphai biang ha kane ka kynti na ka bynta ban pynliem ïa ka Atletico, kaba dangkhmih lynti ban pynurlong ha ka sien nyngkong jong ka ha ka Copa del Rey naduh ba ka rah teng ha u snem 2013.
Tang mar ïasdang ka jingïalehkai u Ander Barrenetxea u la pynkhih jar nyngkong ha ki 14 sekhon na ka bynta ka Sociedad, hynrei u Ademola Lookman (19) u la lah ban pynïakhaid kylla na ka bynta ka Atletico. Hashwa ban kut ka jingïalehkai jong ka kylla step u Mikel Oyarzabal u la ïoh ban thep kol lyngba ka penalty na ka bynta ka Sociedad hashwa ba u Julian Alvarez un pynïakhaid na ka bynta ka Atletico, hynñiew minit shwa ban wai.
