Itanagar, ïaïong:
Ki pulit jong ka Itanagar ki la kem ïa uwei u pulit jong ka Arunachal Armed Police Battalion (AAPBN) tang hapoh katto katne kynta hadien ba ki la buh jingthoh ïa ka mukotduma kaba ïadei bad ka jingkynnoh ba u la ai sngewbha ïa u kuli 9mm sha uwei u dkhot jong ka seng ba ïakhun pyrshah drok, la ïathuh ki heh sorkar.
Katei ka mukotduma ka dei kaba ïadei bad uwei u briew bym lah ban ithuh uba la ïathuh ba u la aiti ïa u kuli 9mm ubym pat pyndonkam sha u Gumin Mize jong ka seng treimon sngewbha jong ka Anti-Drugs Warrior.
Kane ka kam ka la khring ïa ka jingpyrkhat jong ki paidbah hadien ba ka durkhih kaba ïadei bad kane ka jingjia ka la saphriang bha ha ki Social Media, kaba la pynlong ïa ki pulit ban tuklar mardor.
Haba leh halor kane ka jingujor, ka kynhun pulit ba la ïalam da u SDPO u Itanagar Chera Saban ryngkat u Officer-in-Charge jong ka Chimpu Police Station u Inspector N. Nishant bad u Sub-Inspector Sanjeet Jha ki la pynlong ïa ka jingkhynra kaba ïatreilang ban lap bad ban wad ïa une u briew.
Ki heh sorkar ki la ong ba ka kynhun ka shaniah ha ka jingpeitngor ba stad bad ka jingïatreilang ha ka kyrdan jong ka jaka ban buddien ïa ki nongshah kynnoh. La kem ïa une u briew hapoh saw kynta hadien ba la dep ban buh jingthoh da ka jingujor ejahar.
Ïa kane ka jingkhynra la pynlong hapoh ka jingpeit jong u Superintendent of Police ka Itanagar Capital Region u Jummar Basar.
Une u briew uba la shah kynnoh u dei uba la tip kyrteng kum u Ngelong Ngemu uba dei u Constable jong ka AAPBN.
Ki pulit ki la mudui mukotduma pyrshah ïa u katkum ka kyndon 351(2) jong ka Bharatiya Nyaya Sanhita (BNS), ba la pule ryngkat bad ka kyndon 25(1)(a) jong ka Arms Act.
Mynta u don ha kti jong ki pulit, bad ka jingtohkit kaba bniah halor kane ka kam ka dang ïaid shakhmat, la bynrap shuh shuh ki heh pulit.
