Shillong, Ïaïong 19
Ka lympung ïalehkai Inter School Under-18 Cricket Tournament 2026 ba la pynïaid da ka Shillong Cricket Association ka la nangjam shaphrang ha kaba ka St. Anthony’s HSS bad ka St. Nanak SS ki la khur jingjop ha ka sngi U Blei.
Ha kane ka jingïalehkai ka St. Anthony’s ka la pynliem noh ïa ka Gandhi Buniyadi School da 97 run. Ka St. Anthony’s kaba la shimti ban tied nyngkong ha ka la kamai 150 run bad shah pynhap 6 wiket ha ki 20 over. U Samelawan u la tied 36 run na ki 25 bol bad u Abhinav Khanal u la ïoh 43 run na ki 36 bol. Katba u Suraj Kumar u la khur 2 wiket bad ïa ka 1 wiket la khur da u Ankush Ray.
Haba wan beh ïa ka thong ki nongtied ka Gandhi Buniyadi School ki la shah pynkhyllem lut baroh bad kamai tang 53 run ha ki 13.1 over. U Suraj Kumar u la tied 11 run na ki 8 bol. Katba u Wansada Kharpan u la khur 3 wiket bad ïa ki 2 wket la khur da u Unmukt Deka. Ïa ka nam Player of the Match la khur da u Samelawan.
Haba phai sha kawei pat ka jingïakhun, ka St. Nanak ka la jop da 91 run ïa ka B.K Bajoria. Ka B.K Bajoria kaba la jop ïa ka kynting pisa ka la ailad ïa ka St. Nanak ba kan tied nyngkong ha kaba ka la kamai 142 run bad shah pynhap 6 wiket ha ki 15 over. U Dhiraj kumar Mahato u la long u nongtied uba kynsai ha kaba u la ïoh ban khyrwit ïa ka shiteng spah kaba 53 run na ki 32 bol bad u Ayush Kr u la ïop 31 run na ki 14 bol. Katba u Priyanka Singh u la khur 2 wiket.
Haba wan beh ïa ka thong, ki nongtied ka BK Bajoria ki la shah pynkhyllem lut baroh bad kami tang 51 run ha ki 14.4 over. U Anish Kedia u la tied 20 run na ki 17 bol. Katba u Rahul Kumar u la khur 3 wiket bad ïa ki 2 wiket la ïoh da u Ayush Kr. Ïa ka nam Player of the Match la khur da u Dhiraj Kumar Mahato.
