Imphal, ïaïong:
U Myntri Rangbah ka Manipur, u Yumnam Khemchand Singh, ha ka sngi Thohdieng, u la khot ïa ka jingïakren bad ka jingïa shongsuk shongsaiñ, ha ka jingleit jngoh jong u ïa ki katto katne ki shnong ha Ukhrul distrik, kum shi bynta ban pyndap ïa ka jingduna jingshaniah hapdeng ki jaitbynriew Kuki bad Tangkhul Naga.
Haba batai ïa ka jingïakren kum ka lad ban ïaid shakhmat, u Myntri Rangbah ka Jylla u la ong, “Ym don lad shuh lait noh tang ka jingïakren na ka bynta ban wanrah biang ïa ka jingsuk,” haba ïakren bad ki nongshong shnong ha ka por ba u pynlong ïa ka prokram shakri paidbah.
Ha ka jingïakren kaba sngewrit ha ka shnong Thawai Kuki, u Khemchand u la pynpaw ïa ka jingsngewrit hadien ba u la ïakynduh ïa kawei ka kynthei kaba la shah pynpra katba ka dang ïasam ïa ki jingeh jong ka. U la ong ba ka jingshah thombor kan don ka jingma kaba jrong, khamtam eh kaba ktah ïa ki khynnah.
Haba pynpaw ïa ka jingdonkam jong ka jingïatylli, u Myntri Rangbah u la ong ba wat hapdeng ka jingsngewsih bad jingsngew babe kaba jur, ngi dei ban pyrkhat ïa ki pateng ban wan bad na ka bynta kane, ki rangbah kum ma ngi ki dei ban synshar ïa ka jingmut jingpyrkhat jong ngi.
U Khemchand u la pynthikna ruh ïa ki nongshong shnong ba un sa peit ban sdang biang ïa ki skul kiba long man ka por na ka bynta ki skul. Ha ka jingïadon lang u MLA ka thaiñ, u la pynpaw ruh ba ka jingshna ïa katei ka jingkieng ka dei kaba la don lypa ha ka prokram treikam.
U la ong ba ïa ki mat kum ka jingpynbiang um dih yn sa pynbeit katkum ka jingbuh hakhmat eh, katba ïa ki kam pynroi kiba dang ïaid shakhmat, kynthup ïa ka jingshna jingkieng, yn pynsted.
Ha kane ka jingleit jngoh ba nyngkong jong u sha Ukhrul, u Myntri Rangbah ka jylla u la sangeh ruh ha Sharkaphung, ka shnong Tangkhul Naga. La pdiang sngewbha ïa u da u nongsynshar shnong, ki riew rangbah, ki longkmie bad kiwei ki nongshong shnong.
U Khemchand u la ïakren bad ki nongshong shnong bad u la kylli bniah ïa ka jinglong jingman jong ki. U la khot ïa ki nongmihkhmat na ka thaiñ ban sdang ïa ka jingïakren ïasuk bad u la ban jur ba ka jingïakren ka dei ban long ha ka jinglong kaba suk bad kaba tei.
Halor ka jingshna ïa ka jingkieng ha ka shnong Sharkaphung kaba pynïasoh ïa kiwei pat ki bynta jong ka distrik, u Myntri Rangbah u la bthah ïa u Chief Engineer, PWD ba dei peit ba un peit ïa kane ka kam bad u la pynthikna ba ïa ka jingshna ïa kane ka jingkieng yn sa shimkhia mynta u snem lyngba kiwei pat ki lad ki lynti bapher bapher, u la bynrap.
