Shillong, Ïaïong 19
Ka Maram FC ka la bteng ia ka jingjop kaba ar ha ka 5th Meghalaya State League, hadien ba ka la pynliem noh ïa ka Balmanduri FC da 4-1 kol ha ka jingïalehkai jong ka Group-G ha ka sngi Saitjaiñ ha Williamnagar.
Ha kawei pat ka jingïakhun jong ka Group- F, ka Lawbah SC ka la jop da 3-2 kol ïa ka Umlakro SC ha Mairang.
Ha ki ar sngi ba la lah, ka Maram ka la jop da 3-2 kol ïa ka A’chik SCO Rongjeng bad mynta ka la sngi ka la lah ban khur biang ïa ka ingjop pyrshah ïa ka Balmanduri, kaba la ïoh ban ïalehkai ha ka sngi kaba nyngkong ha kane ka lympung.
Ha kane ka jingïakhun ka Balmanduri ka la pynkhih jar nyngkong eh ha ka minit kaba 40 lyngba u Ganapati Rabha na ka bynta ban tam shi kol ha ka kylla step. Hynrei ka Maram ka la wanphai da ka jingkhlaiñ bor ha ka kylla miet ha kaba ka la ïoh ban thep haduh saw kol kaba la wan lyngba u Santosh Teron (51′), Bris Taro (66′) bad u Jakchim K Marak (84′, 88′).
Ha kawei pat ka jingïakhun ha Mairang, ka Umlakro ka la ïoh ban pynkhih jar nyngkong eh lyngba u Georgesteven Thangkhiew ha ka minit kaba 21. Hynrei u Mebadonbor Shangpliang (40′) bad u Fini Frankly Ramsiej (42′) tam da 2-1 kol ha ka kylla step na ka bynta ka Lawbah.
Hadien katto katne por ka Umlakro ka la ïoh ban thep kol biang lyngba u Georgesteven ha ka minit kaba 61, hynrei ka Lawbah ka la lah ban pynurlong lyngba ka kol kaba khatduh lyngba u rangïalehkai shongben u Kitborlang Sohtun (81′) na ka bynta ban pynlong ïa kane ka kynhun ban khur ïa ki 3 poiñ.
Kane ka lympung kan bteng biang ha ka lah sngi U Blei ha kaba baroh ki jingïalehkai kin long ha ka por 3 baje nohphai sngi.
