Shillong, Ïaïong 19
Ka Shillong Sports Association (SSA) ka la pynpaw ka jingsngewlem halor ka jingkhlad kyndit u nongkitkam ba shit-rhem jong ka, u Bah Dister Macdonald Marbaniang, hadien ka jingjia shah tynrah ha kawei ka thuk thuk ha ka 11 tarik mynta u bnai ha Lapalang, Shillong.
Ha ka jingïalang sngewlem (condolence meeting) kaba la long ha ka janmiet jong ka sngi U Blei ha ka por 4 baje janmiet, ba la lamkhmat da u President u Bah Banteidor Lyngdoh uba dei ruh u MLA ka Mawkynrew Constiuency, kum shi bynta ban pynpaw ïa ka dak ka jingsngewlem halor ka jingkhlad noh jong u Bah Dister.
Na ka liang ki dkhot ka SSA ki la pynlong ka jingsngap jar kaba 2 minit, ha kaba ki la pynpaw ruh ïa ka jingduh kaba khraw ha ki bynta ki kam ïalehkai ha ka Jylla. “Ka jingkhlad noh u Bah Dister shisha kan pynblaw ïa ka sur sawa ha SSA Stadium ym tang kata ïa ka jingnoh synñiang shitrhem jong u ha kaba ïadei bad ki kam ki jam ka Shillong Sport Association”, la bynrap Bah Banteidor.
Na ka liang ka synjuk ki lah leit ban sngewlem sha ka ïing ka sem u Bah Dister kaba ha Nongrah.
Lah ban kdew ba ka jingjia ïa u Bah Dister ka dei ha ka 11 tarik bad u khlad noh ha ka 17 tarik mynta u bnai ha ka por kumba 11:30 eiei mynmiet. Ïa ka met kaba sah jong une u rangbah yn pyndep mynta ka lah sngi U Blei (20 tarik) ha u lum jingtep ka Balang Presbyterian Mawkhar ha Lawmali.
