Imphal, ïaïong:
Ki la don da ki hajar ngut ki briew kiba la ïamih ryntih na ka bynta ban pynlong ïa ki jingïakhih ha kylleng ki district jong ka them Manipur halor ka jingjia jong ka jingthombor ha kine ki khyndiat sngi ba la leit ha kaba ka la shim ïa ka jingim jong arngut ki heprit.
Ka jingïakynad ka la mih bad ki bor pahara, ki la pyndonkam da ki tyndong lyer pynsat khmat ban pynpra ïa ki jingïalum jong ki paidbah. Ki nongïakhih ki la dawa ban kem, ban pynshitom da kaba tyngeh pyrshah ïa ki lehnoh bad ban pyntreikam ïa ka NRC hashwa ka Census 2027.
Shuh shuh la ïathuh ba ki la don da ki hajar ngut ki paidbah, kiba la mih sha surok bad ki lynti synkien jong ki jaka bapher bapher jong ki distrik kiba don ha ka them Manipur, ha ka janmiet jong ka sngi U Blei, ban pyrshah jur halor ka jingshah thombor jong kine ki heprit da u bom, ha kaba ki lehnoh ki la kawang ïa ka ïingsah jong ki.
Ka Koirengei bad ka Hatta Golpati ha Imphal East district, Kakching district, bad ka Mayai Lambi ha Imphal West baroh ki la pynlong ïa ki jingïakhih ha ka por mynmiet.
Ha Uripok ha Imphal West, Khabam Lamkhai bad Koirengei ha Imphal East, bad ha sor Kakching ha Kakching, la kynnoh ba ki nongïakhih ki la ïaleh pyrshah bad ki bor pahara.
Katkum ka jingong ki bor pynïaid, ki bor pahara ki la pynsapra ïa ki nongïakhih ha ki katto katne ki jaka ha kine ki distrik da kaba pyndonkam da ki bom pynsat khmat.
Hapoh ka jingpeit jong ka All Manipur United Clubs Organization (AMUCO), COCOMI, bad kiwei kiwei ki seng, ki jingïakhih ki la dawa ban kem ïa kiba donkti ha ka jingpynbthei bom ha Tronglaobi ha Bishnupur ha ka 7 tarik, Ïaïong, kaba la shim ïa ka jingim jong kine ki heprit, kumjuh ruh ban dawa ha ka ban pynshitom mardor ïa ki lehnoh Kuki kiba la shah pynshisha ba ki la donkti ha kane ka kam thombor ha kine ki distrik.
Nalor kata, ki nongïakhih ki la dawa ba dei ban thaw noh ïa ka National Register of Citizens (NRC) shwa ban pynlong ïa ka Khanasumari jong u snem 2027.
