Nongstoiñ, Ïaïong 20
Shi bynta ban pynïaid shakhmat ïa ka Golden Jubilee, ka Nongpyndeng Sport Social & Cultural Club (NSS&CC) ka la pynlong ïa ka lympung ïalehkai Futsal ha ki kyrdan bapher bapher kiba kynthup ïa ka Under-10, Under-14, lem, Open Category bad Veteran bad na ka bynta ki kynthei.
Ïa kane ka lympung la pynlong ha Sankine Futsal Ground, Nondeiñ bad ki don baroh haduh 33 tylli ki kynhun kiba la ïashim bynta kiba kynthup ïa 16 tylli ki kynhun ha Open Category bad Veteran, 8 tylli ha ka liang ki kynhun jong ki kynthei, 5 tylli ha ka liang ki khynnah shynrang kiba hapoh 14 snem, bad 4 tylli kiba hapoh 10 snem.
Haba phai sha katei ka sngi plie ïa katei ka lympung, ha ka Open Category jong ki shynrang, ka Dong-1 ka la jop da 3-0 kol ïa ka Dong-6 A, katba ka Dong-8 A ka la jop ïa ka Dong-3 da 3-1 kol.
Shuh shuh ka Veteran A ka la jop ïa ka Dong-4 da 3-0 kol, ka Dong-2 ka la jop da 3-1 kol ïa ka Dong 5 A , katba ha ka liang ki kynthei la jop da ka Mawkhlam ïa ka Dong-8.
Ha katei ka lympung ïalehkai u Commandant ka 4th MLP Battalion Sohpian u Bah VDS Rymbai ula long u kongsan, bad u Rev. T.T Diengdoh kum u symbud kongsan, ha ryngkat ka jingïadonlang ki nongïalam jong ka klob ba kynthup ïa u Dr. L.L Mawsor (Secretary), u Convener ka Golden Jubilee Futsal Tournament Bah Rockfellar Dkhar, u Bah Yoophi Symblai, trai ka Sankine Futsal bad kiwei kiwei.
