Shillong, Ïaïong 20
U manager ka Arsenal u Mikel Arteta u la ïakynduh jingeh hadien ba ka kynhun jong u ka la shah rem da 1-2 kol ha ka Manchester City ha ka sngi U Blei bad u la ong ba ka jingïaknieh ban rah ïa ka Premier League ka la sdang biang ha kaba ki dangsah sa san sien ïakhun ban pyndep.
Lada ka la lah ban khur ïa ka jingjop kan jin da la pynlong ïa ka kynhun u Arteta ban tam khyndai poiñ na ka bynta ban rah ïa ka nam lahduh ha ka sien kaba nyngkong naduh ba ka la rah teng ha u 2004.
Ka jinglah ban thep kol khatduh u Erling Haaland ha ka kylla miet ka la long ka jingplie lad ïa ka City ban pynshong synjur ïa ka Arsenal. Kane ka kynhun ka lah ban knieh noh ïa katei ka kyrdan ba hakhlieh lada ka lah ban jop sa ïa ka Burnley ha ka sngi Palei.
“Ka Premier League ka la sdang biang la jam shaphrang ban don ha ka jingïaknieh. Mynta baroh ki dangdon ha kti ïa ki jingïalehkai ba dangsah. Ngi dangtam 3 poiñ bad ngi dangsah sa san sien ïakhun,” la ong utei u manager uba na Spain hadien ba ka Arsenal ka la mad ïa ka jingshah rem ha ka sien kaba saw ha ki jingïakhun kiba ha katei ka ri.
“Ka paw shai ba ki nongïalehkai ki la sngewsih shibun halor ka jingbym lah ban khur jingjop ha kane ka jingïakhun.”
Watla ka City ka la jop ïa ka Arsenal, hynrei ki jingïalehkai kiba dangsah jong kine ki ar tylli ki klob ki pyni jingkyrmen sha ka kynhun u Arteta. Kan ïalehkai ha la ïing pyrshah ïa ka Newcastle United, Fulham bad ka Burnley bad ka jingïalehkai shabar na la ïing kan long sha West Ham United bad Crystal Palace.
Hadien ka jingïakhun pyrshah ïa ka Burnley, ka kynhun u Pep Guardiola kan ïakynduh pyrshah ïa ka Everton bad ka Bournemouth shabar na la ïing, katba ïa ka Brentford, Aston Villa bd ka Crystal Palace ha la ïing.
Shuh shuh ka Arsenal kan hap ban pynkhreh ruh ïa ki jingïalehkai semi final ha ka Champions League pyrshah ïa ka Atletico Madrid. Te kumta ka jingtynjuh bor kan long ïa kane ka kynhun jong u Arteta.
Kumba ka long mynta ka Arsenal ka dangbat ïa ka kyrdan ba hakhlieh bad kamai 70 poiñ na ki 33 sien ïakhun, bad na ka liang u Arteta u la don ba kan sa don ka jingkylla. “Ngin sa peit kaei ka ban jia ha ka Premier League. Ban jop ïa ka jingïalehkai ha kane ka lympung ka long kaba eh bha.”
