Shillong, Ïaïong 20
Ka RB AnupChand Hindi SS bad ka Gorkha Pathshala School ki la khur jingjop ha ka Under-18 Inter School Cricket Tournament ba la pynïaid da ka Shillong Cricket Association ha ka lah sngi U Blei.
Ha kane ka jingïakhun ka Gorkha Pathshala ka la pynliem noh ïa ka Little Angels School da 10 wiket. Ka Little Angels kaba la kam trai ban tied nyngkong, ka la kamai 49 run hadien ba ka la shah pynkhyllem baroh ki nongtied ha ki 13.1 over. Kane ka la wan lyngba ka jingïalehkai bha ki nongkawang bol ka Gorkha kiba kynthup ïa u Abhay Kumar Mahato, uba la khur 3 wiket bad u Karan Chettri uba la ïoh 2 wiket. Katba u nongtied ka Lyttle Angles u Shubham Kumar u la tied 19 run na ki 20 bol.
Haba wan shimti ïa ka pali kaba ar, ka Gorkha Pathshala School ka la lah ban kynjoh sha ka thong da kaba kamai 53 run ha ki 2.1 over. U Md Sk Amir u la tied 26 run na ki 12 bol bad u Basant Budha u la ïoh 14 run na ki 4 bol. Ïa ka nam Player of the Match la khur da u Abhay Kumar Mahato, uba la khur 3 wiket.
Haba phai sha kawei pat ka jingïakhun kaba ar, ka RB AnupChand Hindi Sec School ka la jop da 7 wiket ïa ka St. Xaviers SS. Ka St Xaviers kaba la shimti ban tied nyngkong ka la kamai 77 run bad shah pynkhyllem baroh ki nongtied ha ki 12.1 over. U Vinay Kumar u la tied 11 run na ki 12 bol. Katba u Deepak Ray u la khur 5 wiket bad ïa ki 2 wiket la ïoh da u Shankar Shah.
Ka RB AnupChand kaba la shimti ïa ka pali kaba ar ka la lah ban kynjop sha ka thong da kaba kamai 81 run bad shah pynhap 3 wiket ha ki 5.4 over. U Shivam Ray u la tied 46 run na ki 21 bol. Katba u Vinay Kumar u la khur 2 wiket. Ïa ka nam Player of the Match la khur da u Deepak Ray.
