Shillong, Ïaïong 20
Ka Nongkseh SSCC ka la pynjem khnap ïa ka Umkaber SCC haduh 13-0 kol na ka bynta ban khur ïa ka jingjop kaba ar ha ka Group-A jong ka 5th Meghalaya State League, ha ka lah sngi U Blei ha SSA Stadium.
Kane ka long ka sngi ha kaba baroh san tylli ki kynhun ba paw ka nongbah ki la lah ban khur jingjop na ka bynta ban jam sha ki kyrdan ba hakhlieh ha ki jong ki group. Kiwei pat kiba la khur jingjop lang ha kane ka sngi ki long ka Umlakro SC ha ka Group-F bad ka A’chik SCO Rongjeng ha ka Group-G.
U Chesterpaul Lyngdoh (5′, 45′, 56′) bad u Shano Tariang (12′, 38′, 52′) ki la khur ïa ki hat-trick, katba u Khrawkupar Jana (32’P, 45’+1), Kitboklang Pale (57′, 78′) bad u Sheen Sohktung (70′, 82′) ki la thep mar ar kol na ka bynta ka Nongkseh. Ïa kawei pat ka shi kol la ïarap pynthep da u rangïalehkai ka Umkaber u Banshanlang Kharsynniang (30′).
Ka Umkaber ka la shah thep ïa ka kol kaba lai kol hadien ba u Andriano P Mawlong u la sei da ka red card namar ba u la tan ïa u Shano hapoh ‘box’. Ka jingïaleh-kai sa tang shiphew ngut ki rangïalehkai ka la buh jingeh ïa ka Umkaber bad ka la shah thep biang sa saw kol hashwa ba kut ka kylla step.
Kawei pat ka hat-trick ka dei ha ka jingïalehkai ha Amlarem ha kaba u Damanbhalang Chyne (12′, 28′, 44’P) u la lah ban pynurlong na ka bynta ka lahduh, ka Mawlai SC ha kaba ka la pynliem noh ïa ka Lamin XI SCC da 6-1 kol ha ka Group-C.
Ïa kiwei pat la thep da u Arkibor Makhroh (17′), Basuk-lang Bina (32′) bad u Wadshwa Latoo (86′) na ka bynta ka Mawlai, katba u Shanbor Sumer (19′) u la pynphai kylla shi kol ïa ka Lamin XI.
Ha ka jingïalehkai jong ka Group-B ha madan MFA Polo, ka Nangkiew Irat SC ka la jop da 3-0 kol ïa ka Mawphu SC. Ïa kine la thep tang ha ka kylla step lyngba u Dibinroy Nongspung (5′, 38′) bad u Banshanlang Nongdhar (43′).
Kumjuh ha Williamnagar, ka A’chik SCO Rongjeng ka la jop ïa ka Attong Matgrik FC da 3-0 kol ha ka -G. Ïa kine la thep da u Perioush N Sangma (50′) bad u Klubarth M Sangma (66′, 72′).
Kane ka long ka jingshah rem kaba ar ïa ka Attong Matgrik bad kawei ka kynhun kaba la shah rem ar sien ka dei ka Mishon SSCC ha Group-F. Hadien ka jingshah rem ha ka Langsning FC ha ka taïew ba la lah, mynta ka kynti ka la shah rem da 1-0 kol sa ha ka Umlakro SC ha Mairang bad ïa kane la thep da u Jewelstar R Marak (6′).
Haba phai sha ka jingïalehkai jong ka Group-E ha Wahïajer, ka lahduh jong ka MSL 2019 ka Shillong Lajong FC ka la pynliem ïa ka Lamyrsiang SCC da 3-1 kol. Ïa kine la thep da u Hamedamanbha Wahlang (27′), Lalmuansanga (46′) bad u Deibormame Tongper (63′) na ka bynta ka Lajong, katba u Eborki Marsharing (45’+2) u la pynphai shi kol na ka bynta ka Lamyrsiang.
Kumjuh ha ka jingïalehkai jong ka Group-H kaba la long ha Mawkyrwat, ka Rangdajied United kaba long ka lahduh ha ka MSL 2023, ka la pynliem ïa ka Seng Samla Umdang Pyllun da 3-1 kol. Ïa kine la thep da u Pasborlang Khonglikong (9′), Phibankhrawbok Nongkhlaw (31′) ba du Khaiñkupar Ïawphniaw (62′), hynrei u Rangkyn-saistar Mawsor (86′) u la pynphai kylla shi kol na ka bynta ka SSUP.
Ha kawei pat ka jingïalehkai jong ka Group-D ha Khliehriat, ka Ladthadlaboh SC bad ka Jalaphet Moochut Pyrdung SC ki la ïakhaid mar 2-2 kol. ka Jalaphet ka la thep kol nyngkong lyngba u Thomas Dkhar (57′) bad u Briwon Dkhar (59′), hynrei ka Ladthadlaboh ka la pynphai kylla ar kol lyngba ka penalty ba la shut da u Andrew Nanghuloo (71′) bad u Evening Tariang (90’+1).
