Aizawl, ïaïong:
Ki shipai jong ka tnat Assam Rifles, ha ka jingkhynra kaba heh bha ba la pynlong kum shi bynta ban ïakhun pyrshah ïa ki nongkhaïi tuh, ha ryngkat ka jingïatreilang bad ka tnad Custom ki la ïoh ban kurup ïa ka song kaba bun jong u sikret bar ri kaba shongdor T.2.37 klur tyngka na Zemabawk South ha Aizawl jong ka Mizoram.
Ki heh sorkar ki la ïathuh ba la ïoh kurup haduh 99 tylli ki song sikret kiba wan nabar ri ha kane ka jingkhynra lang, bad la kem ïa uwei u briew ha kaba ïadei bad katei ka jingïoh kurup. Ïa ka tarik ba la pynlong ïa kane ka jingleit khynra ym shym la pyntip da katei ka kynhun shipai.
Ïa une u briew uba la shah kem, ryngkat bad ki mar ba la ïoh ban kurup, la aiti noh sha ka tnad Customs ha Aizawl ban leh ïa kaba donkam katkum ka aiñ bad ban tohkit. Ki bor pynïaid ki la ong ba katei ka jingkhynra ka dei shi bynta jong ka jingpyrshang kaba bteng ban tehlakam ïa ki kam khaïi beaiñ ha kane thaiñ.
