Guwahati, ïaïong:
Ha kawei ka jingjia, kaba la jia bad kaba la ai mynsiem ban pynshlur ïa kiba bun, uwei u nongshong shnong jong ka shnong Dhubri kaba don ha Assam, u la lah ban pynpulom ïa ka jingthmu leit tuh bad lute jong uwei u runar, kane ka jingjia ka la jia ha ka miet jong ka 19 tarik, Ïaïong.
Kane ka kam shlur jong une u nongshong shnong ka la pynlong ïa u nonglute uba don ryngkat ki tiar pynmynsaw ba un sahkem katba arngut kiwei pat ki la lait phet.
Kane ka jingjia ka la jia ha ka ïingsah jong u Chandra Sekhar Das ha Ward No. 2, ha kaba la kynnoh ba lai ngut ki runar ki la rung ha ryngkat ki tiar pynmynsaw bad ki dieng Club halor ka jingthmu jong ki ban leit lute.
U Das uba la tip ïa kane ka jingwan jong kine ki runar, u la pyrta bad pynsngew halor kane ka jingdon jong kine ki runar, ha kaba ki para marjan kiba la tip bad ïohsngew ïa kane, ki la her bran bran sha ka ïingsah jong u.
Hapdeng katei ka jingkulmar, arngut na ki runar ki la lait phet noh, katba uwei pat u la shah khangkdong ha ki dkhot jong katei ka longïing bad shah set hapoh kawei ka kamra.
Kine ki runar kiba la lait phet, ki la ïoh ka lad ban phet ha ka por ba ki briew kiba thmu ban leit ïarap ïa katei ka longïing ki dang tur puk na kiba bun ki lang ban leit sha ka ïing ba la jia ka jingjia.
Ki pulit ki la kyrmen ba shen yn sa ïohkem noh ïa ki, naba uwei napdeng jong u u la shahkem bad na ka jingtohkit ïa u yn sa ïoh kem ïa kiwei pat.
Ki pulit ka Dhubri Sadar Police Station ki la poi sha katei ka jaka bad ki la kem ïa utei u runar ïa uba la tip kyrteng kum u Lal Chand Ali.
Ka la don ka jingujor ejahar halor ka jingjia, bad ki pulit ki la pynlong ïa ka jingkhynra ban lap ïa kiwei pat ki runar kiba la lait phet. Ki heh pulit ki la ïathuh ba ka jingtohkit ka dang ïaid shakhmat bad ki la kyntu ïa ki nongshong shnong ban long kiba husiar.
