Shillong, Ïaïong 21
Ka jingïalehkai bha ka Aniesha Arengh (7/13) ha ka jingkawang bol ka la pynlong ïa ka Meghalaya ba kan pynliem noh ïa ka Sikkim da 6 wiket ha ka 2nd U-15 North East Rising Cup 2026 ha ka sngi Ba-ar ha Guwahati.
Ha kane ka jingïakhun ka Sikkim ka la shimti ban tied nyngkong ha kaba ka la shah pynkhyllem baroh ki nongtied bad ban kamai tang 59 run ha ki 18.2 over. Kane ka la wan lyngba ka jingtbit ka Aniesha ha ka jingkawang bol, kaba la lah ban khur haduh 7 wiket. Katba kiwei pat ki nongkawang bol kiba la lah ban pynhap wiket ïa ka Meghalaya ki long ka Badphihirta Nonglait (1/5), Laviola Mary L Mawlong (1/14) bad ka Onasa M Sangma (1/16).
Ka Meghalaya kaba la wan shimti ïa ka pali kaba ar, ka la lah ban kynjoh sha ka thong bad shah pynhap 4 wiket ha ki 14.1 over. Ka Mebalapynkmen Syiemlieh ka la long ka nongtied kaba kynsai ha kaba ka la ïoh 14 run.
Ha kane ka jingïakhun baroh ki ‘thei ïalehkai kane ka kynhun ka Jylla ki la deng ïa ki jaiñ ïong (armband) ha ki kti jong ki ban kynmaw burom ïa u Bah Dister Marbaniang, uba la khlad noh ha ka taïew ba la lah. U Bah Marbaniang u la long u President jong ka East Khasi Hills Cricket Association bad u la long ruh u Manager ha kiba bun ki kynhun ïalehkai ka MCA ha ki snem kiba la dep.
Kane ka lympung ïalehkai kaba thmu ban kyntiew ïa ki kper sara jong ki jingïalehkai kriket ki kynthei (grassroots) na ka thaiñ shatei lammihngi lyngba ka jingshim khia da ka Assam Cricket Association.
