Shillong, Ïaïong 21
Ka Chennai Super Kings (CSK) ka la mad ïa ka jingeh kaba khraw hadien ba la pynthikna ba la weng noh ïa u nongtied ba kynsai u Ayush Mhatre na ka bynta ki jingïakhun kiba dangsah jong kane ka Indian Premier League 2026.
Une u rangïalehkai ba dang 18 snem ka rta u la mynsaw (left hamstring injury) ha ka por ba u ïalehkai na ka bynta ka kynhun pyrshah ïa ka Sunrisers Hyderabad ha ka 18 tarik mynta u bnai.
Ha ka kyrwoh ba la pyllait ha ka lah sngi U Blei, kane ka kynhun ka la pynthikna ïa ka jingmynsaw u Mhatre ka la long kaba jur ha kaba u donkam ban sangeh ïalehkai kumba 6 haduh 12 taïew, kaba mut ba un duh syndon ban ïalehkai ha kane ka lympung.
U Mhatre u la long u nongtied ba kynsai ha kane ka aïom. Hadien ba u la lah ban pynpaw ïa ka jingtbit ha u 2025 ha kaba u la mih madan ha ka sien kaba nyngkong kum u nongïalehkai uba mih bujli, une u rangïalehkai ba la kha ha Mumbai u la shim bynta biang ha kane ka samoi ïalehkai da ka jingkyrmen ban ïalehkai hadien ba u la long kum u nongïalam na ka bynta ka kynhun ïalehkai U-19 jong ka ri India sha ka World Cup dangshem mynta u snem.
Ha ka kyrwoh ba la pyllait, ka CSK ka la ong, “U Ayush Mhatre u la shah weng noh na ka bynta ki jingïalehkai ba dangsah jong ka IPL 2026 namar ka jingmynsaw ha ka por ba u dangïalehkai pyrshah ïa ka Sunrisers Hyderabad ha ka 18 tarik mynta u bnai. Te kumta ka jingmynsaw u Ayush ka donkam ba un ban shah sumar kumba 6 haduh 12 taïew. Ngi ai ka jingkitbok ba un ïoh ka jingkoit jingkhiah kaba kloi.”
U Mhatre u la long u nongïalehkai ba paw na ka bynta ka Super Kings mynta u snem. Ha ki hynriew tylli ki jingïalehkai jong u, u la lah ban ïalehkai bha. U la kamai 201 ron ha ka ‘strike rate’ kaba 177.88, kynthup ïa ar tylli ki shiteng spah (half century), bad mynta u long uwei ki nongïalehkai kiba la tam 15 run ha kane ka samoi.
