Shillong, Ïaïong 21
Ka Langsning FC ka la lah ban pynpaw ïa ka jingtbit ha ka 5th Meghalaya State League ha kaba ka la pynliem noh ïa ka Lawbah SC da 5-3 kol ha ka sngi Ba-ar ha Mairang.
U Nelson Rymbai (7′, 10′, 88′) u la khur ïa ka hat-trick na ka bynta kane ka kynhun ïalehkai jong ka Shillong Premier League, hynrei u rangïalehkai ka Lawbah u Adonydevy Riwan (19′, 45’+1, 89′) u la khur ïa ka hat-trick hashwa ba kane ka kynhun kan shah rem noh ha kane ka jingïalehkai jong ka Group-F.
U Nelson u la long u rangïalehkai ba kynsai na ka bynta ka Langsning, ha kaba u la ïoh ban thep ar kol hapoh 10 minit hashwa ba un bynrap sa kawei pat hashwa ban wai. Kiwei pat ki rangïalehkai kane ka kynhun kiba la lah ïoh thep kol ki long u Dajiedlang Wanshnong (33′) bad u Chusrang Sangma (42′).
Ki la don ar tylli ki jingïalehkai ha Shillong, ha kaba ka Khimusniang SC ka la pynliem ïa ka Mawshun SCC da 3-1 kol ha ka Group-A ha SSA Stadium, katba ka Mawlum Tyrsad SCC ka la jop da 4-2 kol ïa ka Mulang SC Nongbah ha a Group-B ha madan MFA.
U Arkhangel Khong-tyngkut (31′) u la ïoh ban thep kol nyngkong na ka bynta ka Mawshun, hynrei hadien ar minit ka Khimu-sniang ka la pynïakhaid kylla lyngba u Civility Khongmalai (33′). Ïa kiwei pat ki kol la thep da u Primrose Lamat (65′) bad u Lamborki Lyngdoh (74′) na ka bynta ban khur syndon ïa ka jingjop.
Ha kawei pat ka liang, ka Mawlum Tyrsad ka la thep haduh 3 kol tang ha ki 22 minit lyngba u Banshem Khongsit (5′), Marcellino Khongsit (11′) bad u Pyndapborlang Khong -sit (22′) ha ka penalty. Hynrei ka Mulang ka la ïoh ei shi kol lyngba ka jingïarap pynthep da u Bansamlang Nongbet (44′) bad kawei pat da u Woldrik Susngi (46′). Hashwa ban wai ka Mawlum Tyrsad ka la lah ban thep biang sa shi kol lyngba u Ebetstar Nong-bet (88′) bad ban khur syndon ïa ka jingjop.
Ha ka jingïalehkai jong ka Group-G ha Wil-liamnagar, ka Maram FC ka la shah rem noh ha ka Janepih YSCA da 3-0 kol. Kane ka la wan urlong lyngba u Edyson Ïawphniaw (26′), Alphascius Sangriang (30′) bad u Wankuparlang Khardieng -ngan (65′).
Ka Mawten SC ka la khur jingjop ha Mawkyr-wat ha kaba ka la pynliem noh ïa ka Mawlarshong SC da 3-1 kol ha ka Group-H. U Charles Lyngdoh (3′) u la long uba stet tam ban thep kol ha kane ka lympung, katba ki paralok jong u, u Over-sharp Ïawphniaw (57′) bad u Debenroy Thongnibah (90’+4) ki la bynrap ha ka kylla miet. U Hopeful-lness Wanñiang (82′) u la lah ban pynphai kylla shi kol na ka bynta ka Mawlarshong.
Haba phai sha ka jingïalehkai jong ka Group-D kaba la long ha Amlarem hapdeng ka Amlarem SC bad ka Laskein SCSC ki la kut ha ka jingïakhaid hadien ba kim shym la lah ban thep kol haduh kaba kut ka jingïalehkai. Katba ha Khliehriat, ka Rym-bai Shkenshynriah SC bad ka Thangskai Tiger SC ki la ïakhaid hadien ba kim shym la lah ban thep kol.
Ha ka sngi Balang kan don tang kawei ka jingïalehkai hapdeng ka Attong Matgrik FC bad ka Balmanduri FC ha ka Group-G ka ban long ha Williamnagar ha ka por 3 baje nohphai sngi.
