Shillong, Ïaïong 21
Ka Sunrise Academy ka la pynliem noh ïa ka Gandhi Buniyadi School da 2 run na ka bynta ban khur jingjop ha ka Inter School U-18 Cricket Tournament ba la pynïaid da ka Shillong Cricket Association ha ka sngi Ba-ar.
Ha kane ka jingïakhun, ka Sunrise Academy ka la kam trai ban tied nyngkong ha kaba ka la kamai 119 run bad shah pynhap 7 wiket ha ki 20 over. U Harsh u la tied 34 run na ki 31 bol bad u Ashish Kumar u la ïoh 28 run na ki 32 bol. Katba u Sumit Kumar bad u Suraj Kumar ki la khur mar 2 wiket.
Haba wan beh ïa ka thong, ka Gandhi Buniyadi ka la kamai tang 117 run bad shah pynhap 9 wiket ha ki 20 over. U Sumit Kumar u la tied 31 run na ki 42 bol bad u Navin Rabha u la ïoh 27 run na ki 22 bol. Katba u Ashish Kumar bad u Numan Ahmed ki la khur mar 3 wiket. Ïa ka nam Player of the Match la khur da u Ashish Kumar.
Haba phai sha kawei pat ka jingïakhun kaba ar, ka Shillong HSS ka la jop da 6 wiket ïa ka Nongthymmai Nepali School. Ka Nongthymmai Nepali kaba la shimti ban tied nyngkong ka la kamai 116 run bad shah pynhap 7 wiket ha ki 20 over. U Bikash Paswan u la tied 46 run na ki 40 bol. Katba u Abhijit Chanda bad u Sonu Kumar ki la khur mar 2 wiket.
Haba wan shimti ïa ka pali kaba ar, ka Shillong HSS ka la lah ban kynjoh sha ka thong da kaba kamai 119 run bad shah pynhap 4 wiket ha ki 19.5 over. Kane ka la wan lyngba ka jingïalehkai bha u Gautam Paul, uba la ïoh ban khyrwit 57 run na ki 38 bol. Katba u Suraj Chettri u la khur 1 wiket. Ïa ka nam Player of the Match la khur da u Gautam Paul.
