Shillong, Ïaïong 21
Ka Mawlai Sports Club ka la pynthikna ban leit shim bynta ha ka lympung ïalehkai I-League 3, 2025-26 bad kan pynkreh ban ïakhun nyngkong pyrshah ïa ka Sikkim Brotherhood FC ha ka 27 tarik mynta u bnai ha Khuman Lampak Stadium kaba ha Imphal, Manipur.
Ïa kane la pynpaw da u President u Bah Marcel Kharbani ha ka sngi Ba-ar ha ka jingïalang bad ki nongthoh khubor ha Shillong Press Club ha ryngkat ka jingïadon lang ki dkhot nongkitkam katei ka klob lem bad ki rangïalehkai.
Kane ka jingrung ka Mawlai sha ka I-League 3 ka dei hadien ba ka la rah ïa ka nam lahduh ha ka Meghalaya State League 2025-26 ba la pynlong da ka Meghalaya Football Assocoation.
Te kumta ka Mawlai ka la don ha ka Group-A kaba kynthup lang ïa ka FC Raengdai, Sikkim Brotherhood, Sunrise Club Orissa bad ka ARA FC.
U Bah Marcel u la pynpaw ba kane ka long ka sien kaba nyngkong eh ïa ka Mawlai ban ïoh shi bynta ha katei ka lympung. “Ïa ka Mawlai SC yn ïalam da u coach da u Bah Hering Shangpliang bad ngi khmih lynti ba kane ka kynhun kan lah ha ka ban ïalehkai bha pyrshah ïa kitei ki kynhun.”
Kumba ka paw u Bah Hering u dei u coach ba kynsai ka Jylla bad dei ha ka jingïalam ka jong u ba ka Shillong Lajong Football Club ka la ïoh rung sha ka I-League ha u snem 2009. “Kumba ka Lajong ka la lah ban kiew kyrdan sha ka I-League, nga khmih lynti ruh ba ka Mawlai kan lah ban pynurlong sha ka thong. Ki rangïalehkai ka Mawlai ki dei kiba la shim na kylleng ka Jylla lyngba ka jingïoh ban jied ïa kiba kynsai bad ngin mihkhmat beit tang ki Khasi kiba napoh ka Jylla,” la ong u Bah Shangpliang.
“Ngim shym la ïoh ban pynkhreh bha, namarba ngi la ïoh ka jingpynthikna tang ha ka por kaba lyngkot kata ha u Lber mynta u snem bad naduh katei ka por ngi la pyrshang katba lah ban pynkhreh ïa ka kynhun.”
U Bah Marcel u la ïathuh ba haduh mynta ym shym la don ba kyrshan ïa kane ka klob lait noh tang ki katto katne ki riew rangbah kiba na Mawlai kiba la mih shakhmat ban jingkyrshan. “Ngi la ïakynduh ruh ïa ka Sorkar Jylla ba kan ïarap ban ai jingkyrshan lang ïa ki bad ïa ki kot ki sla kiba ki donkam la dep ban phah bad mynta ka shong pat sa ha ka Sorkar ba kan leh eiei.”
U Secretary kane ka klob u Bah Mawkordor Nongsiej u pynpaw, ba baroh ka jinglut jingsep ha kane ka jingleit shim bynta ka la kot sha ki T. 50 lak.
U pyntip ruh ba u nongmihkhmat ba mynta u la noh synñiang lyngba ka skhim Special Rural Works Programme (SRWP) bad kyrpang halor ka I-League-3 ruh ngi la dep ïakynduh ïa u bad u la dep kular ba un sa ïarap ïa ki.
U kapten kane ka klob u Daman Bhalang Chyne u la pynpaw ba ka thong jong ki hi ki long ba kin ïoh rung sha ka I-League 2. “Kane ka long ka thong ka jong ngi ban ïoh rung sha ka I-League 2.”
Ïa une u kapten la synran lang da u Vice Captain u Robertson Malkovich Khongriah bad u Fairming Suting.
Lah ban kdew ba ha kane ka lympung ki don 20 tylli ki kynhun ha kaba la phiah ïa ki ha ki saw tylli ki group. Ki kynhun ki ban wan ha ki kyrdan ba hakhlieh ryngkat bad ar tylli kiba kynsai, kin ïoh rung sha ka wat ba khatduh (final round). Te kumta ki ar tylli ki kynhun kiba kynsan ha ka wat ba khatduh kin ïoh rung sha ka I-League 2 2026-27.
