Nongstoiñ, Ïaïong 22
Ka shlem treikam jong ka District Sports Officer (DSO),West Khasi Hills ka la plie ïa ka lympung ïalehkai 31st West Khasi Hills District Level Inter School Athletic Meet 2026 ha ka sngi Balang ha kaba la wan shim bynta 26 tylli ki skul na kylleng jong kane ka district.
Ïa kane ka lympung ïalehkai ka ban neh lai sngi kynthih la pynlong ha madan Nongpathar, ha kaba Kong C. Kharbhih, District School Education Officer, WKH ka la long ka kongsan ha ryngkat ka jingdonlang u Dr.R. M Lyngdoh, Principal ka Synod College Nongstoiñ kum u symbud kongsan, ka Kong Balarina Syiem, DSO,WKH, nangta la donlang ruh ka Kong D.Pahkyntien, DSWO,WKH kum ka nongshah khot sngewbha kaba la ai ruh ïa ka jingkren jingpynshai halor ka Drug bad kiwei pat.
Ïa kane ka lympung la phiah ha la ki jong ki kyrdan ïalehkai kata ka Under-14, Under-16 bad ka Under-18 jong ki kynthei bad shynrang. Haba kheiñ lang baroh ki don haduh 945 ngut nongshim bynta, kiba kynthup ïa 479 ngut ha ka liang ki shynrang bad 466 ha ka liang ki kynthei.
Ha kane ka lympung la pynlong ïa ki jingïalehkai bapher bapher naduh ki jingïakop mareh, ki high jump, long jump, javelin throw, discuss throw, Triathlon, Shotput bad kiwei kiwei.
Ki khynnah kiba kynsai ha kane ka lympung kin shah jied ban mihkhmat na kane ka District sha ka State Level Inter School Athletic Meet 2026 ka ban sa long shen ha ka nongbah Shillong na ka bynta ban ïaknieh ïa ka nam lahduh.
