Shillong, Ïaïong 22
Ka Balmanduri FC ka la lah ban pynliem ïa ka Attong Matgrik FC da 7-1 kol ha ka jingïakhun jong ka Group-G ha ka 5th Meghalaya State League ha ka sngi Balang ha Williamnagar.
Kane ka long artad ka jingïakhun kaba tang kawei kaba la pynlong mynta ka sngi, ha kaba ka kynhun ïalehkai jong ka Balmanduri kaba na North Garo Hills, ka la sdang ban ïuh kjat ha kane ka lympung da ka jingshah rem ha ka jingïalehkai kaba nyngkong kaba la long myn ha ka 18 tarik mynta u bnai, hynrei mynta ka kynti pat ka la lah ban wanphai da ka jingjop.
Kane ka kynhun ka la lah ban thep saw kol ha ka kylla step ha kaba u Goodnear Marak (21′) u la pynkhih jar nyngkong. Hadien shiteng kynta ka la thep biang ïa ka kol kaba ar lyngba u Jurisbirth Marak (30′) kumjuh u Ganapati Rabha (41′) bad kawei pat da u kapten u Chichang M Momin (45′).
Hadien katto katne por ba la bteng biang ïa ka jingïakhun jong ka kylla miet, ka Balmanduri ka la ïakhun tyngeh ha kaba ka la thep kol biang lyngba u Rabha (70′) bad u Dipunjay Rabha (75′). Kane ka kynhun ka la ïoh ban thep biang khyndai minit shwa ban wai lyngba u Jurisbirth (81′). Tang hadien saw minit ka Attong Matgrik ka la lait na ka jingshah brut da kaba ka la lah ban pynphai kylla shi kol lyngba u Sunil M Marak (85′) hashwa ba kan mad ïa ka jingshah rem.
Ha ka sngi Palei kan don tang kawei ka jingïakhun jong ka Group-G hapdeng ka A’chik SCO Rongjeng pyrshah ïa ka Janepih YSCA ha Garo Hils ha ka por 3 baje nohphai sngi.
