Shillong, Ïaïong 22
Ka Shillong Lajong FC kan pynkhreh ban ïakhun nyngkong ha ka ‘Championship Round’ jong ka Indian Football League 2025-26 pyrshah ïa ka Dempo SC ha ka 26 tarik mynta u bnai ha SSA Stadium, Polo ha ka por 6:30 janmiet.
Kane ka kynhun ïalehkai ka nongbah ka la wan ha ka kyrdan ba-ar ha ka Stage 1 ha kaba ka la kamai 17 poiñ, kata hadien ïa ka Diamond Harbour (22 poiñ) kaba bat ïa ka kyrdan ba hakhlieh. Kiwei pat ki kynhun kiba la don ha ka thup kaba hynriew ki long ka Rajasthan FC (17 poiñ), Sreenidi Deccan (15 poiñ), Chanmari (11 poiñ) bad ka Dempo (9 poiñ).
Ïa kane ka wat jingïakhun jong ka ‘Championship Round’ yn pynlong ha la ïing bad shabar. Te kumta ka Lajong kan pynkhreh ïa ka jingïakhun kaba ar pyrshah ïa ka Chanmari FC ha ka 2 tarik u Jymmang ha kane ka nongbah, hashwa ba kan leit sha Hyrderabad na ka bynta ban ïakhun pyrshah vaz ka Sreenidi Deccan ha ka 10 tarik.
Ka Lajong kan wanphai biang sha la ïing na ka bynta ka jingïakhun pyrshah ïa ka Rajasthan United ha ka 15 tarik bad kan leit sha West Bengal ban ïakhun pyrshah ïa ka Diamond Harbour ha Kalyani Stadium ha kaba ïa ka tarik yn sa pynbna hadien.
