Shillong, Ïaïong 22
Ka Meghalaya Roll Ball Associa-tion ka la wan shakhmat ban pynbna paidbah ba kan pynlong ïa ka 2nd Senior East Zone National Roll Ball Championship 2026 ha ka 24 bad 25 tarik mynta u bnai ha madan ïalehkai Basketball kaba ha J.N Stadium, Polo.
Ïa kane la pyntip da u Working President kane ka synjuk u Bah Suklang Dkhar ha ka sngi Balang ha Shillong Press Club ha kaba la ïadon lang u Bah Joshua Sohtun, Vice President bad u Bah Freddy Marboh ba long dkhot jong ka Meghalaya Roll Ball Association.
Nalor ka Meghalaya, kiwei pat ki jylla ki ban wan shim bynta ha kane ka lympung ki long Assam, Arunachal Pradesh, Jharkhand, Chattisgarh, Odisha bad ka West Bengbal ki ban kynthup lang ïa ki kynthei bad shynrang.
Lah ban kdew ba ïa kane ka lympung la sdang nyngkong ha Pune ha u snem 2003 bad hangne hapoh ka jylla Meghalaya la sdang nyngkong ha u 2019 bad hadien kane ka la lap ba wan noh ka jingkhangdam (locked down), hynrei kane ka synjuk ka la sdang pat noh ban pyntyllun shakhmat ïa kane ka lympung naduh u snem 2022.
Na ka liang u Bah Suklang u la pynpaw ba ka Jylla ka la kiew ha ka jingdon ki nongïalehkai Roll Ball bad ka synjuk ka la lah ban pynlong ïa ka 4th Federation Cup, kaba hangne la lap bad shem ba ki khun samla ka jylla, ki la sdang ban shim khia bha ha kane ka jingïalehkai.
Lyngba kane ka jingwan kane ka lympung ïalehkai, u Bah Suklang u la pynpaw ïa ka jingthrang ba ka Roll Ball kan long kum kawei na ki jingïalehkai ka ban ïoh rung ha ka 39th National Games 2027 ka ban long ha kane ka Jylla, namar kane ka jait jingïalehkai ka don jingkyrmen ba ka Jylla kan khur takma.
