Aizawl, ïaïong:
Kiba bun ki song jong u jingdih pynbuaid uba la kot sha ka T. 465 klur ki la shah pynduh ha ka distrik Champhai jong ka Mizoram ha ka sngi Ba-ar, kaba long kawei na ki kam pynduh ïa ki jingdih pynbuaid kaba heh tam ha ka jylla.
Ki heh sorkar ki la ïathuh ba ïa u drok la ïoh kurup da ki pulit na ki jaka bapher bapher ha khappud Myanmar hapdeng u bnai Lber bad Risaw jong u 2025. Ïa katei ka jingpynjot la leh hadien ba la ïoh ïa ka jingpynbna na ka ïingbishar jong ka distrik.
Kine ki song ki kynthup ïa 35.85 kg u drok heroin kiba shong dor T.71.7 klur, 490.89 kg u drok Methamphetamine kiba shongdor T.392.71 klur, bad 4.74 kg u drok alprazolam ba la antad ba ki shongdor T.94.8 lak.
U Deputy Commissioner u Mohammad Aaquib u la batai ïa kane ka jingpyntreikam kum ka sienjam kaba kongsan ha ka jingpynkhreh kaba dang ïaid shakhmat jong ka distrik pyrshah ïa u drok.
U la kdew ba ki drok kiba shongdor T.117 klur ki la shah pynjot ha Champhai ha u snem ba la dep, kaba pyni ïa ka jingkiew kaba jur ha ka jingtreikam jong ki bor pynjari aiñ.
U Aaquib u la ban jur ïa ka jingdonkam ban leh ïa ki kam kiba neh pyrshah ïa ka jingkhaïi drok bad u la khot ïa ki jingpynsngewthuh paidbah kiba kham khlaiñ ban ïada na ka jingdih drok hapdeng ki samla. U la kyntu ruh ïa ki nongshong shnong ban ïarap ïa ki bor pynïaid da kaba ïasam ïa ki jingtip shaphang ki kynhun khaïi drok beaiñ.
Ha kaba ïadei bad ka jingroi jong ka Champhai kum ka jaka jngohkai pyrthei, u la ong ba ka jingpynneh ïa ka aiñ ka dang long kaba kongsan ban pynthikna ba ki nongwan jngohkai kin mad ïa ka distrik ha ka rukom kaba bha.
Ki jingkheiñ jong ki pulit ki pyni ba ki don 147 tylli ki jingjia kiba la shah mudui hapoh ka Narcotic Drugs and Psychotropic Substances (NDPS) Act ha u snem 2025, kaba la pynlong ïa ki ban shah kem haduh 260 ngut, kynthup ïa ki 58 ngut ki nong Myanmar. Ki jingshah kem ha ka shisnem ki kynthup ïa ka jingkynrei jong u drok heroin, methamphetamine, crystal methamphetamine, caffeine bad alprazolam.
Ka jingpyntreikam ka la bteng mynta u snem. Hapdeng ka 1tarik Kyllalyngkot haduh 20 tarik, Ïaïong, ki pulit ki la mudui haduh 47 tylli ki mukotduma hapoh ka NDPS bad ki la kem 76 ngut ki briew, ba kynthup ïa 22 ngut ki nong Myanmar.
Ha kane ka por, ki bor pynïaid ki la ïoh ban kurup palat 8 kg u drok heroin, palat 76 kg u drok methamphetamine bad palat 10 kg u drok crystal methamphetamine.
