Imphal, ïaïong:
Ka jingïakynad ka la mih ha T Khullen ha shilynter ka National Highway-2 ha ka sngi Ba-ar, hadien ba la pynthut ïa ka jingkhot pakhang da ka United Naga Council, kaba la pynmih ïa ka jingpynrem kaba jur na ka liang ka Tangkhul Naga Long.
Katkum ka jingpynbna ba la pynmih da ka komiti treikam jong ka seng, kane ka jingjia ka la jia ha ka por ba don ka jingkhang dam kaba lai sngi kaba la peit bniah da ki nongtrei mon sngewbha jong ka seng ki samla pule jong ka Senapati District.
Ïa katei ka jingkhang dam la khot ban pyrshah ïa ka jingshah pynïap jong ki arngut ki riew paidbah ha kaba sdang jong une u bnai hajan kawei ka shnong ha Ukhrul distrik.
Ka kyrwoh ka la kynnoh ba ka kynhun pulit na Kangpokpi distrik ki la poi ha kawei ka jaka talasi ha ka por mynstep bad ki la pyrshang ban bat ïa uwei u nongtrei mon sngewbha, kaba la wanrah ïa ka jingkulmar ha katei ka jaka.
Ka la kynnoh shuh shuh ba ka kynhun ki riew shimet na kawei ka shnong kaba marjan hadien ki la weng noh ïa ki jingker ha shilynter ka surok bah, kaba la pynmih ïa ka jingïakynad.
Ki jingïakynad ki la bud hadien habud, ha kaba la ïoh jingtip ba la don ka jingshah kawang maw kaba la pynlong ïa ki katto katne ngut ki briew ban mynsaw bad pynjulor ym duna ïa ka ar tylli ki kali.
Ka seng ka la kynnoh ruh ba ki briew kiba don tiar ki la siat ha ka por ba jia katei ka jingjia, katba ki bor pahara ki la pynphai da ki jingsiat da ki lyer pynsat khmat bad ki kuli thylli ban tehlakam ïa ka jinglong jingman.
Ka komiti ka la buh jingkylli ïa ka jingleh jong ki shipai jylla bad pdeng, da kaba kynnoh ba ki don ka jingsngew shiliang khmat ha kaba pynïaid ïa ka jinglong jingman.
Ka la ong ba kum kine ki jingleh ki lah ban pynthut ïa ki jingpyrshang ban pynïoh biang ïa ka jingsuk ha katei ka thaiñ, kaba la sakhi ïa ka jingïakynad hapdeng ki jaitbynriew kaba ju wan biang.
Haba khot ïa ka jingkitkhlieh, ka Tangkhul Naga Long kala kyntu ïa ka sorkar jylla ban wad ïa kiba donkti ban sdang ïa ka jingshah thombor bad ban shimkhia katkum ka aiñ.Ym shym la don kano kano ka jingpynbna ba thikna na ki pulit ne ki bor pahara ha ka por ba ujor ïa kane ka kaiphod.
