Jowai, Ïaïong 22
Ka lympung ïalehkai District Level Inter School Athletic Meet 2026 ba la pynlong da ka shlem treikam u District Sports Officer (DSO) West Jaiñtia ka la sdang ha ka sngi Balang ha Wahïajer Multi Sports Complex.
Ha kane ka lympung ïalehkai ka ban neh lai sngi kynthih la ïasnoh kti lang ryngkat ka West Jaiñtia District Sports Association (WJDSA), ha kaba ka la khring ïa palat 725 ngut ki nongïalehkai na ki 23 tylli ki skul ha kylleng ka West Jaiñtia District. Ha kane ka lympung la pynlong ïa ki jingïalehkai bapher bapher kiba la phiah ha la ki jong ki kyrdan kata ka U-14, U-16, bad U-18 jong ki khynnah kynthei bad shynrang.
Ïa kane ka lympung la wan ban plie da ka District School Education Officer ka Dr. (Mrs) Wa-i-Sa Sumer kum ka kongsan ha kaba la ïadon lang u Working President ka WJDSA u Bah EMH Passah, u Vice President u P. Lamare, bad u District Sports Officer u Khroobok Passah, uba la ai ïa ka jingkren pdiang sngewbha ïa ki kynhun kiba la wan shim bynta.
Hashwa ban sdang kane ka lympung, na ka liang ka samla Peaceful Pohplet, kaba la ïoh ïa ka nam Best Athlete jong u snem 2024-25 bad kaba dei ka samla pule na ka North Liberty HS School, Jowai, ka la shim ïa ka jingbam smai na ka bynta ki skul kiba la wan shim bynta.
Ha ai jingkren ha kane ka sngi, ka Dr. Sumer ka la pynpaw ïa ka bynta kaba kongsan jong kane ka jingïalehkai kaba kyntiew ïa ki samla, da kaba pynksan ba ka jingïashim bynta ka ïarap kham bun ban ïa ka jingkoit jingkhiah ha ka met. Ka la pynkut da kaba ong, “Katba nangeh ka thma, katta nangthiang ka jingjop. Ka trophy ka lah ban jot noh, hynrei ki jingkynmaw kin ïai sah shirta.”
