Shillong, Ïaïong 23
Ka Meghalaya Boxing Association (MBA) kan pynlong ïa ka State Junior (15-16 years) Boys & Girls and Youth (17-18 years) Men & Women Boxing Championship 2025-2026 ha ka 27 tarik mynta u bnai ha madan Basketball kaba ha Mawlal Mawroh, Shillong.
Ïa kane ka rynsan ïakura yn wan ban plie da u Commissioner and Secretary ka tnat ïalehkai ka Sorkar Jylla u Vijay Kumar D (IAS) kum u kongsan ha kaba kin don phra tylli ki synjuk ïalehkai na ki district lem bad ki klob kin wan ïashim bynta.
Na ka liang ka MBA ka la khmih lynti ïa ka jingwan shim bynta da palat 100 ngut ki nongïakura kynthei bad shynrang na ka bynta ban pyni ïa ki sap ïalehkai jong ki ha la ki jong ki kyrdan. Ha ka Junior ki kyrdan jingkhia kin long naduh 42-44kg haduh 70kg, katba ha ka liang ki Youth ki kyrdan jingkhia kin long naduh 44-46kg haduh 75kg. Ïa kane ka rynsan ïakura la kyrshan da ka tnat ïalehkai jong ka sorkar Jylla.
