Shillong, Ïaïong 23
Ka shi kol ba la thep da u Bankheiñlang Rongrin ka la biang pura ïa ka Janepih YSCA ba kan pynliem noh ïa ka A’chik SCO Rongjeng da 1-0 kol ha ka lympung ïalehkai 5th Megha-laya State League ba la pynïaid da ka Meghalaya Football Association ha ka sngi Palei ha Williamnagar.
Kane kan dei artad ka sien jop kaba lai ïa ka Janepih kaba la biang pura ïa ka ba kan don ha ka kyrdan ba hakhlieh ha ka miej ïakheiñ poiñ jong ka Group-G bad khlem da shah thep wat tang shi kol ruh ha kane ka lympung.
Haba phai sha ka A’chik SCO, ym dei ba ka la ïalehkai sniew, pynban ki rangïalehkai jong ka, ki la ïakhun tyngeh, hynrei ha kaba kut ki la hap ban pdiang ïa ka jingshah rem kaba ar ha kane ka lympung bad ban khur tang 3 point na ka bynta ban don ha ka kyrdan ba saw napdeng ki san tylli ki kynhun ba don ha kane ka group.
U Bankheiñlang u la ïoh ban thep ïa katei ka kol, hadien ka jingwan mih ka jong u na kaba shong ben (substitute), bad u la ïoh ïa ka kabu kaba biang eh na ka bynta ban thep kol.
Ha kawei pat ka khubor, ka don ka jingpynkylla haba ïadei bad ka por jong ka jingpynïalehkai ïa ka Group-A kaba la buh ban long ha ka sngi Thohdieng, ha kaba ka jingïakhun ba nyngkong la buh ba kan long noh ha ka por 1 baje mynsngi ban ïakhun hapdeng ka Umkaber SCC pyrshah ïa ka Khimusniang SC.
Katba ka kynhun ïalehkai ka Nongkseh SSCC kan mih madan ban ïakhun pyrshah ïa ka Mawshun SCC ha ka por 5 baje janmiet.
