Shillong, Ïaïong 23
Ka Nongthymmai Academy bad ka Shillong HSS ki la jam sha ka semi final ha ka lympung ïalehkai Inter School Under-15 Cricket Tournament 2026 ba la pynïaid da ka Shillong Cricket Association, hadien ba ki la khur jingjop ha ka sngi Palei.
Ha ka jingïalehkai quarter final kaba nyngkong, ka Nongthymmai Academy ka la pynliem noh ïa ka Nongthymmai Nepalu School da 5 wiket. Ka Nongthymmai Academy kaba la jop ïa ka kynting pisa, ka la ailad ïa ka Nongthymmai Nepali School ban tied nyngkong ha kaba ka kamai 113 run bad shah pynkhyllem baroh ki nongtied ha ki 20 over. U Raj Paswan u la tied 41 run na ki 32 bol bad u Runu Sinha u la ïoh 30 run na ki 31 bol. Katba u Avishkar Chettri u la khur 3 wiket bad ïa ki 2 wiket la ïoh da u Sushant Thapa.
Haba wan shimti ïa ka pali kaba ar, ka Nongthymmai Academy ka la lah ban kynjoh sha ka thong da kaba kamai 114 run bad shah pynhap 5 wiket ha ki 18.3 over. U Avishkar Chettri u la tied 27 run na ki 30 bol. Katba u Roshan Kumar u la khur 2 wiket. Ïa ka nam Player of the Match la khur da u Avishkar Chettri, uba la tied 27 run bad khur 3 wiket na ka bynta ka Nongthymmai Academy.
Haba phai sha kawei pat ka jingïakhun quarter final kaba ar, ka Shillong HSS ka la jop da 5 wiket ïa ka Sunrise Academy. Ka Sunrise Academy kaba la kam trai ban tied nyngkong ka la kamai 109 run bad shah pynhap 6 wiket ha ki 20 over. U Rajdeep Singh u la tied 30 run na ki 34 bol bad u Vidhan Ruchal u la ïoh 23 run na ki 28 bol. Katba u Fredrick Kharsyntiew u la khur 2 wiket bad ïa ka 1 wiket la ïoh da u Rajdeep Gosh.
Ka Shillong Higher Secondary School kaba la wan shimti ïa ka pali kaba ar ka la lah ban kynjoh sha ka thong da kaba kamai 113 run bad shah pynhap 5 wiket ha ki 16.5 over. U Mewanai Kongbuh u la tied 39 run na ki 49 bol. Katba u Aniket Singh u la khur 1 wiket. Ïa ka nam Player of the Match la khur da u Rajdeep Gush uba la tied 19 run bad shim 1 wiket na ka bynta ka Shillong HSS.
