Shillong, Ïaïong 23
Ka kynhun ïalehkai phutbol ka Pakistan ka la weng noh ïalade na ka SAFF Women’s Championship 2026 na ka daw ka jingïapher jingmut hapdeng kine ki ar tylli ki ri, la pynbna ka Pakistan Football Federa-tion (PFF) ha ka sngi Palei.
Kane ka rai kaba la mih na ka jingïakynad ha ka saiñ hima sima hapdeng ka India bad ka Pakistan, ka la pynlong ïa ka South Asian Football Federation (SAFF) ban duna sha ki hynriew tylli ha ka jingdon ki kynhun ha katei ka lympung, kaba la buh ban long ha Pandit Jawaharlal Nehru Stadium kaba ha Margao, Goa, naduh ka 25 tarik u Jymmang haduh 6 tarik u Jylliew.
Kane ka long ka sien kaba ar ba ka India kan pynlong ïa ka SAFF Women’s Championship, hadien ba ka la pynlong nyngkong ha u snem 2016 ha Siliguri, West Bengal, ha kaba ka India ka la khur ïa ka nam lahduh ha ka sien kaba saw. Kan dei ruh ka sien kaba ar ba ka Goa kan pynlong ïa ka lympung ïalehkai jong ka SAFF. Ïa ka lympung ïalehkai jong ki shynrang la pynlong ha u snem 1999 ha PJN Stadium, ha kaba ka India ka la rah ïa ka nam lahduh, da kaba pynliem ïa ka Bangladesh ha ka phainal.
Da ka jingmih noh jong ka Pakistan, ki bor pynïaid katei ka lympung ki la pynbiang beit tang hynriew tylli ki ri ki ban wan shim bynta. Ha ka jingpynïakap kaba la long ha ka sngi Balang ha SAFF Secretariat ha Dhaka, ka la phiah ïa ki kynhun ha ki ar tylli ki group kiba kynthup ïa ka Nepal, India (nongpdiang), Sri Lanka, Bangladesh (kaba la bat ïa ka nam lahduh), Bhutan, bad ka Maldives.
Kane ka jingweng noh ka la long ka jingkhanglad ïa ka kynhun ki ‘thei ïalehkai ka Pakistan na ka bynta ban pynpaw ïa ki sap ïalehkai.
