Shillong, Ïaiong 24
Ka jingïalehkai ïakop ñiah kali ka MRF MO-GRIP Supercross Championship 2026 ka dang ïai bteng da ka Round ba 2 ka ban long ha ka 25 tarik u Ïaiong 2026 ha Navelim, Goa. Hadien ka jingïalehkai plie kaba itynnad bha ha Madan Kurkalang, Bhoirymbong, ka jingïakob mynta ka la kynriah noh sha kawei na ki jaka ïalehkai kaba heh tam ha ka ri, kaba kular ïa ka jingïalehkai ka ban don ka jingïakhun kaba jur bha bad ka jingïakop kaba itynnad.
Ka jingkdew kaba kongsan na ka bynta kane ka round kadei ka jingmihkhmat na ka jylla Meghalaya, ha kaba saw ngut ki nongñiah kali kiba don sap – u Meban Suiam, u Paominthang Vaiphei, u Elbis L. Lyngkhoi, bad u Skhemborlang Dkhar – ki la jop ban rung sha ka kyrdan bad kamai ïa ki poiñ ba kordor ha ka Round 1 na ka bynta ki jingïakop ñiah kali ha ka Jylla.
Kine ki nongñiah kali ki la pyni ïa ka jingaiti, ka jinglong ryntih, bad ka jingminot kaba kyrpang ha ka jingïaid lynti jong ki ban poi sha ka kyrdan ïakop jong ka Ri. Ka jinglah jong ki kam dei tang ka jingpynshisha ïa ka jingtbit bad jingkut jingmut jong ki shimet-shimet hynrei ka pyni ruh ïa ka jingnangroi jong ka jingïalehkai niah kali ha ka jylla Meghalaya.
Kaba kham kongsan ka long ba u Elbis L. Lyngkhoi, u Meban Suiam, bad u Skhemborlang Dkhar ki la pynkhreh hapoh ka jingïalam jong u nongjop lai sien ka Ri u Bah Banteilang Jyrwa. Ka jinghikai bad jingshemphang jong u ka la don ka bynta kaba kongsan ha kaba pynwan dur ïa kine ki nongñiah kali sha ki nongïalehkai kiba lah ban ïakhun ha ka kyrdan kaba ha khlieh duh.
Katba ka Round 2 ka nangjan, baroh ki khmat kin peit sha ka kynhun ïalehkai ka Meghalaya namar ba ki thmu ban tei ïa ka jingkhlain jong ki bad ban pynskhem shuh-shuh ïa ka jingdon jong ki ha ka kyrdan ïalehkai jong ki nongjop. Da ka jingkiew ka jingïakhun bad ka jingkiew jong ki jingïalehkai, la khmih lynti ba ka jingïakop kaban sa wan ha Goa kan wanrah ïa ki jingïalehkai kiba pynkmen bad ki por ki bym lah ban klet.
Ka MRF MoGrip Supercross Championship ka dang ïai bteng ban long ka rynsan ba hakhmat eh ban pyni ïa ki sap ñiah kali ba ha khlieh duh jong ka ri India, bad ka jingïashim bynta jong ki nongïalehkai ba dang mih na ki thaiñ kum ka Meghalaya ka pynpaw ïa ka jingïalehkai kaba nang kiew ha kylleng ka ri.
