Shillong, Ïaïong 24
Ka lympung Inter School ha ka kyrdan Under 18 ba la pynïaid da ka Shillong Cricket Association ka la bteng hynne ka sngi da ka jingïalehkai hapdeng ka St Nanak Sec School pyrshah ïa ka Shillong Higher Secondary School ha ka jingïalehkai Quarter Final kaba nyngkong ha kane ka sngi.
Ha ka jingkynting pisa la kam trai da ka St Nanak Sec School bad ka la tied nyngkong ha kaba ka la kamai 174 ron.
Ki nongtied bol ba kynsai u Dhiraj Kumar Mahato u la ïoh 82 ron bad u Ayush Kumar 47 ron katba u Sonu Kumar u la ïoh pynhap 4 wiket bad u Gaurav 1 wiket.
Ha ka kylla beh ïa ka thong ka Shillong Higher Secondary School ka la ïoh tang 56 ron, u Abhijit Chanda u la ïoh 16 ron katba u Piyush Kumar Rai u la khur 4 wiket.
Ïa ka nam ‘Player of the match’ la ïoh da u Dhiraj Kumar Mahato uba la ïoh 83 ron bad khur 2 wiket, bad ka St Nanak Secondary School ka la jop noh da 118 ron.
Ha kawei pat ka jingïalehkai Quarter Final ka la long hapdeng ka St KV Happy Valley pyrshah ïa ka B.K bajoria.
Ha ka jingkynting pisa la kam trai da ka K.V Happy Valley bad ka la tied shuwa ha kaba ka la ïoh 134 ron. U Aadit Pradhan u la ïoh 48 ron bad u Udit Pradhan 33 ron, katba u Shanti Dhoj Sunar u la khur 2 wiket bad u Anish Kedia 1 wiket.
Ha kaba beh ïa ka thong ka B.K bajoria ka la ïoh 126 ron, u Aryan Sunar u la kamai 22 ron bad u Ayush Ray 21 ron katba u Imran Ali u la khur 2 wiket bad u Himanshu ruh kumjuh 2 wiket.
Ïa ka nam ‘Player of the match’ la ïoh da u Aadit Pradhan uba la ïoh 48 ron bad khur shi wiket bad ka K.V. Happy Valley ka la jop noh ha ka jingïalehkai da 8 ron.
