Shillong, Ïaïong 26
Ka Mawlai Sports Club kan pynkhreh ïa ka jingïalehkai ba nyngkong pyrshah ïa ka Sikkim Brotherhood FC ha ka lympung ïalehkai I-League 3 2025-26, mynta ka lah sngi U Blei ha Khuman Lampak Stadium kaba ha Imphal, Manipur ha ka por 3 baje nohphai sngi.
Ka jingrung ka Mawlai sha ka I-League 3 ka dei hadien ba ka la rah nam lahduh ha ka Meghalaya State League 2025-26 ba la pynlong da ka Meghalaya Football Association. Te kumta ka Mawlai ka la don ha ka Group-A kaba kynthup lang ïa ka FC Raengdai, Sikkim Brotherhood, Sunrise Club Orissa bad ka ARA FC.
Kumba ka long mynta ka Mawlai ka dangïashim bynta ha ka 5th Meghalaya State League, hynrei ka hap ban leit shim bynta ha ka I-League 3 ba la pynïaid da ka All India Football Federation (AIFF) na ka daw ba ka MFA kam lah ban pynsangeh ïa ki jingïalehkai jong ka MSL.
Te kumta ka Mawlai ka la hap ban phiah mar shiteng ïa ka jingdon ki rangïalehkai, ha kaba ka hap ban pynïalehkai tang 14 ngut sha Imphal hapoh ka jingkhmih da u coach u Bah Hering Shangpliang. Katba ïa kiba sah yn pynïalehkai ha ka MSL hapoh ka jingkhmih da u assistant coach u Bah Dapmon Tariang.
Kumba ka paw ka Mawlai ka la khur jingjop ha baroh lai tylli ki jingïalehkai ‘group’ ha ka MSL 5 bad u Damanbhalang Chyne u la long u nongthep kol ba kynsai da kaba thep marwei haduh 5 kol.
Na ka liang u President ka MFA u Bah Hamletson Dohling ha ka sngi Thohdieng u la leit ban ai khublei kitbok ïa katei ka kynhun ïalehkai ha madan Heh Mini Stadium hashwa ba kin mih ban leit sha Imphal.
Ki 14 ngut ki rangïalehka ka Mawlai ki ban shim bynta ha ka I-League 3 ki long u Lambhamiki Lamare, Shariwell Lyngdoh, Arkini Laloo, Arkibor Makhroh, Ricky Chyne, Damanbhalang Chyne, Vincent Shyr-mang, Samlang Rympei, Verjelous Shylla, Basuklang Bina, Fairming Suting, Robertson Khongriah, Bajiedlang Rangslang & Wadshwa Latoo. Katba ki nongïarap ki long u Bah Hering Shangpliang (coach), Jerry Sutnga & Dromlan Marngar.
